Memleket basshysy Qasym-Jomart Toqaev Qazaqstannyń halyq jazýshysy Muhtar Maǵaýinniń otbasy men jaqyn-jýyqtaryna kóńil aitý jedelhatyn joldady dep habarlaidy Ult.kz.
Prezident Qasym-Jomart Toqaev asa kórnekti jazýshy, Memlekettik syilyqtyń laýreaty Muhtar Maǵaýinniń dúnieden ótýine bailanysty onyń otbasy men jaqyn-jýyqtaryna kóńil aitty.
"Muhtar Muqanuly ǵibratty ǵumyryn kieli sóz ónerine arnaǵan, ulttyq ádebietimiz ben tarihymyzdyń kókjiegin keńeitýge eleýli úles qosqan zańǵar tulǵa edi. Tól rýhaniiatymyzdyń tórge ozýyna, ult tarihnamasynyń tasqa basylýyna óziniń alǵa qoiǵan asyl muratymen, qaitpas qajyr-qairatymen qaltqysyz eńbek sińirdi. Halyq jazýshysynyń qýatty qalamynan týǵan shyǵarmalary, tarihi eńbekteri, estelik-esseleri qalyń oqyrmannyń júreginen óz ornyn tapty. Sońyna bai ádebi mura qaldyryp, ónegeli ómir súrgen Muhtar Muqanulynyń qaitalanbas esimi halqymyzdyń jadynda saqtalady. Marqumnyń imany salamat, jany jánnatta bolsyn", – delingen jedelhatta.
