Qazaqstan Prezidenti Qyzylorda oblysyndaǵy óńirlik «Rýhani jańǵyrý» ortalyǵynda boldy, dep habarlaidy "Ult aqparat" Aqordaǵa silteme jasap.
Memleket basshysyna ortalyqtyń negizgi qyzmeti jóninde málimet berildi.
Jergilikti biýdjet esebinen boi kótergen bul ortalyq «Rýhani qazyna», «Tárbie jáne bilim», «Atameken», «Aqparat tolqyny» siiaqty baǵyttar boiynsha jumys isteidi.
Qasym-Jomart Toqaevqa Syrdariia ózeniniń sol jaǵalaýyn damytý jónindegi shahardyń bas jospary tanystyryldy.
Aýmaǵy 1,5 myńnan astam gektar jerdi qamtityn bul qurylys alańyna tiisti infraqurylymdar júrgizilgen. Memleket basshysyna aldaǵy ýaqytta bul jerde neke saraiy, órt sóndirý deposy, 900 oryndyq orta mektep, turǵyn úiler, otbasylyq meditsina ortalyǵy jáne basqa da áleýmettik nysandar salynatyny jóninde baiandaldy.
Qasym-Jomart Toqaev Qyzylorda oblysynyń qurylys salasyndaǵy kórsetkishi joǵary ekenin atap ótip, shahardyń órkendep kele jatqanyna toqtaldy.
– Qala qurylysyna osy saladaǵy úzdik tájiribelerdi qoldaný kerek. Jańa texnologiia men qurylys materialdaryn paidalanyp, «Aqyldy qala» (Smart City) júiesiniń komponentterin belsendi túrde engizý qajet, – dedi Qazaqstan Prezidenti.
