Qazaqstan Prezidenti Qasym-Jomart Toqaev Qytai Halyq Respýblikasynyń Memlekettik keńesi Premeriniń orynbasary Han Chjendi qabyldady, dep habarlaidy "Ult aqparat" Aqordaǵa silteme jasap.
Memleket basshysy Han Chjenniń Qazaqstanǵa sapary ekijaqty saýda-ekonomikalyq qatynastardy nyǵaitýǵa septigin tigizetinine senim bildirdi.
Qazaqstan Prezidenti Han Chjendi «Bir beldeý, bir jol» forýmynyń tabysty ótýimen quttyqtap, Si Tszinpinniń Uly Jibek jolyn jańǵyrtý ideiasy halyqaralyq qoǵamdastyq tarapynan qoldaý tapqanyn jáne óziniń ómirsheńdigin dáleldegenin atap ótti.
Qasym-Jomart Toqaev Elbasy Nursultan Nazarbaev pen QHR Tóraǵasynyń jaqynda ótken kezdesýinde qol jetkizgen ýaǵdalastyqtar eki el arasyndaǵy jan-jaqty strategiialyq seriktestikti nyǵaitý jolyndaǵy mańyzdy qadam bolǵanyn aitty.
– Qytaimen tatý qarym-qatynas ornatý Qazaqstannyń syrtqy saiasatyndaǵy eń mańyzdy basymdyqtardyń biri. Eki el arasyndaǵy saiasi, saýda-ekonomikalyq jáne mádeni-gýmanitarlyq bailanystar ózara paidaly ári tiimdi memleketaralyq yqpaldastyqtyń úlgisin kórsetedi. Qytai – Qazaqstannyń iri syrtqy saýda áriptesi. Ekijaqty saýda-sattyqtyń aýqymy qarqyndy ósip keledi, – dedi Memleket basshysy.
QHR Memlekettik keńesi Premeriniń orynbasary Qazaqstanǵa alǵash ret saparmen kelgenin atap ótip, bizdiń elimizdiń jaqsy áser qaldyrǵanyn aitty.
– Qazaqstan táýelsizdik jyldary turaqty damyp keledi. El ekonomikasy ósýde. Ózara qarym-qatynastarymyzdyń damyǵanyna rizashylyq bildiremiz, – dedi Han Chjen.
Kezdesý barysynda Qazaqstan-Qytai birlesken jobalaryn júzege asyrý, Qazaqstan aýyl sharýashylyǵynyń organikalyq ónimderi eksportynyń kólemin arttyrý, transshekaralyq ózenderdi paidalaný jáne týrizmdi damytý máseleleri qarastyryldy.
Kólik-logistikalyq saladaǵy yntymaqtastyqqa erekshe kóńil bólindi. Sonyń ishinde, Lianiýngan portyndaǵy birlesken terminaldyń jáne arnaiy ekonomikalyq aimaqtaǵy «Qorǵas – Shyǵys qaqpasy» qurǵaq portynyń áleýetin paidalaný, tranzitti konteinerlerdiń tasymal kólemin arttyrý perspektivalary talqylandy.
