Parlament Senatynyń Tóraǵasy Qasym-Jomart Toqaev Halyq ókilderiniń búkilqytai jinalysy Turaqty komiteti Tóraǵasynyń orynbasary Ailigeng Imingbahai bastaǵan QHR parlamenttik delegatsiiasyn qabyldady.
«Biz Qytaimen jan-jaqty strategiialyq áriptestikke zor mańyz beremiz, ony nyǵaitýǵa bizdiń memleketterimizdiń basshylary Nursultan Nazarbaev pen Si Tszinpin sheshýshi úles qosty», - dep atap ótti Q.Toqaev.
Qazaqstan Parlamenti joǵarǵy Palatasynyń basshysy Prezident N. Nazarbaevtyń Qytaiǵa aldaǵy memlekettik sapary men onyń Tsindaodaǵy ShYU Sammitine qatysýy ekijaqty qatynastarǵa jańa serpin beretinine senim bildirdi.
Q.Toqaev zań shyǵarý organdary deńgeiindegi bailanystar qarqynynyń arta túsýin saiasi únqatysýdyń mańyzdy bóligi ekenin aitty. Kóptarapty parlamentaralyq uiymdar aiasyndaǵy kúsh-jigerdi úilestirý jańa múmkindikter ashatyn bolady.
Senat Tóraǵasy dinder jáne órkenietter únqatysýyn nyǵaitý isindegi Qazaqstannyń kúsh-jigeri týraly qytai jaǵyn habardar etip, aldaǵy 10-11 qazanda Astanada Álemdik jáne dástúrli dinder liderleri VI Seziniń kún tártibi «Dini kóshbasshylar qaýipsiz álem jolynda» taqyrybyna arnalatynyn atap ótti.
A. Imingbahai Qazaqstanmen strategiialyq áriptestikti damytýǵa Qytaida basa nazar aýdaryp otyrǵanyn jáne aldaǵy maýsymdaǵy joǵary deńgeidegi kezdesý nátijeli bolýyna zor kúsh-jiger salyp otyrǵanyn aitty.
QHR Parlamentiniń Vitse-spikeri parlamentaralyq bailanystardy tereńdetýge arnalǵan birqatar usynystar aitty. Atap aitqanda, A. ImingbahaiQazaqstan parlamentshilerine Qytaidaǵy birlesken seminarǵa shaqyrýdy jetkizdi. HÓBJ delegatsiiasynyń basshysy qaýipsizdikti qamtamasyz etý jáne terrorizmge qarsy is-qimyl jónindegi zańnamalyq sharalar salasynda tájiribe almasýdy belsendi túrde júrgizýge shaqyrdy. Odan basqa, halyq diplomatiiasyna qarqyn berýge, ǵylymi-tehnikalyq, bilim berý, mádeni salalardaǵy bailanystardy jalǵastyrýǵa yqylas bildirdi.
Áńgime barysynda saýda-ekonomikalyq jáne kólik-logistika yntymaqtastyǵyn jańa deńgeige kóterý múmkindigi talqylandy. Q.Toqaev qytailyq transqurylyqtyq «Bir beldeý, bir jol» jobasy men Qazaqstannyń «Nurly jol» baǵdarlamasynyń úilesýi arqasynda ashylatyn aýqymdy múmkindikterge nazar aýdardy. Ailigeng Imingbahai óz kezeginde elektrondyq kommertsiia men tsifrlyq tehnologiia sekildi keleshegi bar salalar ózara is-qimylǵa jańa serpin beretini týraly pikirin bildirdi.
Q.Toqaev qorytyndy sózinde túrli saladaǵy ózara áriptestik qatynastar ornaǵan kórshi memleketter arasynda qandai da bir ózekti máseleler týyndaýy yqtimal ekenin, sondyqtan olar dostyq rýhyndaǵy diplomatiialyq konsýltatsiialar men kelissózder arqyly ǵana sheshilýi tiis ekenin atap ótti. Tóraǵa aldaǵy joǵarydaǵy kezdesýde barlyq máseleler tiimdi kelisimderge kelý, ózara senim jáne dástúrli dostyq negizderinde sheshiletinine senim bildirdi.
