Qazaqstan Prezidenti Qasym-Jomart Toqaev Nur-Sultan qalasyn tútin basqanyn aityp, sózden iske kóshýge keńes berdi, dep habarlaidy "Ult aqparat".
Qasym-Jomart Toqaev "Saryarqa" gaz qubyrynyń qurylysyna qatysty eskertý jasady.
"Qalanyń energetikalyq infraqurylymynyń negizgi máselesi "Saryarqa" gaz qubyryna qosylýǵa daiyn emestigi bolyp otyr. Bul - múlde túsiniksiz ádis. Biylǵy jylǵa qarastyrylǵan 2,7 milliard teńge qalai basqa óńirlerge bólinetin boldy? Birinshi kezekte, elordany gazdandyrý jaiyn oilaýymyz kerek emes pe edi", - dedi Prezident astanany odan ári damytý máseleleri jónindegi jiynda.
Memleket basshysy elorda aspanyn tumshalaǵan tútinnen qala turǵyndary men qonaqtarynan yńǵaisyzdanyp júrgenin aitty.
"Qys kezinde astananyń kórinisi qandai ekenin jaqsy bilesizder. Qalany tútin basady. Eń aldymen turǵyndar aldynda yńǵaisyz. Qalada únemi turatyn sheteldik jumysshylar men diplomatiialyq korpýs aldynda da yńǵaisyz jaǵdaiǵa qalyp otyrmyz. Osyndai problemalar bola tura, ózimizdi halyqaralyq hab, jahandyq qala, Eýraziia júregi dep kórsetemiz. Sózimiz isimizben úilespeidi. Bul durys emes, az sóilep, kóp is tyndyrý kerek, - dedi Toqaev.
