قازاقستان پرەزيدەنتٸ قاسىم-جومارت توقاەۆ نۇر-سۇلتان قالاسىن تٷتٸن باسقانىن ايتىپ, سٶزدەن ٸسكە كٶشۋگە كەڭەس بەردٸ, دەپ حابارلايدى "ۇلت اقپارات".
قاسىم-جومارت توقاەۆ "سارىارقا" گاز قۇبىرىنىڭ قۇرىلىسىنا قاتىستى ەسكەرتۋ جاسادى.
"قالانىڭ ەنەرگەتيكالىق ينفراقۇرىلىمىنىڭ نەگٸزگٸ مەسەلەسٸ "سارىارقا" گاز قۇبىرىنا قوسىلۋعا دايىن ەمەستٸگٸ بولىپ وتىر. بۇل - مٷلدە تٷسٸنٸكسٸز ەدٸس. بيىلعى جىلعا قاراستىرىلعان 2,7 ميلليارد تەڭگە قالاي باسقا ٶڭٸرلەرگە بٶلٸنەتٸن بولدى? بٸرٸنشٸ كەزەكتە, ەلوردانى گازداندىرۋ جايىن ويلاۋىمىز كەرەك ەمەس پە ەدٸ", - دەدٸ پرەزيدەنت استانانى ودان ەرٸ دامىتۋ مەسەلەلەرٸ جٶنٸندەگٸ جيىندا.
مەملەكەت باسشىسى ەلوردا اسپانىن تۇمشالاعان تٷتٸننەن قالا تۇرعىندارى مەن قوناقتارىنان ىڭعايسىزدانىپ جٷرگەنٸن ايتتى.
"قىس كەزٸندە استانانىڭ كٶرٸنٸسٸ قانداي ەكەنٸن جاقسى بٸلەسٸزدەر. قالانى تٷتٸن باسادى. ەڭ الدىمەن تۇرعىندار الدىندا ىڭعايسىز. قالادا ٷنەمٸ تۇراتىن شەتەلدٸك جۇمىسشىلار مەن ديپلوماتييالىق كورپۋس الدىندا دا ىڭعايسىز جاعدايعا قالىپ وتىرمىز. وسىنداي پروبلەمالار بولا تۇرا, ٶزٸمٸزدٸ حالىقارالىق حاب, جاھاندىق قالا, ەۋرازييا جٷرەگٸ دەپ كٶرسەتەمٸز. سٶزٸمٸز ٸسٸمٸزبەن ٷيلەسپەيدٸ. بۇل دۇرىس ەمەس, از سٶيلەپ, كٶپ ٸس تىندىرۋ كەرەك, - دەدٸ توقاەۆ.
