Memleket basshysy Qyrǵyzstan jáne Ózbekstan prezidentterimen telefon arqyly sóilesti, - dep habarlaidy "Ult aqparat" Aqordaǵa silteme jasap.
Qyrǵyzstan prezidenti Sadyr Japarov Qasym-Jomart Toqaevty jalpyhalyqtyq referendýmnyń sátti ótýimen quttyqtap, damýdyń jańa kezeńine qadam basqan Qazaqstanǵa jyly lebizin bildirdi.
Qasym-Jomart Toqaev Sadyr Japarovqa quttyqtaǵany úshin jáne Qyrǵyzstan baqylaýshylarynyń referendýmǵa belsendi qatysqanyna rizashylyǵyn bildirdi. Memleket basshysy Jańa Qazaqstandy qurý úderisinde baýyrlas Qyrǵyzstanmen aradaǵy yntymaqtastyqty odan ári nyǵaitýǵa erekshe kóńil bólinetinin aitty.
Taraptar jaqynda Bishkekte ótken kelissózderdiń nátijesi qazaq-qyrǵyz qarym-qatynastarynyń joǵary deńgeiin naqtylaǵanyn jáne eki el arasyndaǵy strategiialyq seriktestiktiń kókjiegin keńeite túskenin atap ótti. Qazir Qazaqstan men Qyrǵyzstan úkimetteri saiasi, saýda-ekonomikalyq jáne mádeni-gýmanitarlyq salalarda qol jetkizilgen ýaǵdalastyqtardy júzege asyrý jumystaryn júrgizip jatyr.
Ózbek tarapynyń bastamasymen ótken telefon arqyly sóilesý barysynda Ózbekstan prezidenti Shavkat Mirziioev Qasym-Jomart Toqaevty Qazaqstanda jalpyhalyqtyq referendýmnyń sátti ótýimen quttyqtady.
Qasym-Jomart Toqaev Shavkat Mirziioevke quttyqtaǵany úshin rizashylyǵyn bildirip, konstitýtsiialyq reformalar elimizdiń saiasi jáne ekonomikalyq tynys-tirshiligin jańǵyrtýǵa baǵyttalǵanyn atap ótti.
Qazaqstan Prezidenti Ózbekstannan kelgen ókiletti delegatsiianyń referendým barysyn baqylaýǵa qatysqanyn aitty.
Eki memlekettiń basshylary Qazaqstan men Ózbekstan arasyndaǵy strategiialyq seriktestiktiń jáne odaqtastyqtyń dáiekti túrde damyp kele jatqanyna kóńilderi tolatynyna toqtaldy. Buǵan belsendi saiasi dialogtyń joǵary deńgeii men eki el úkimetteriniń úilesimdi jumysy yqpal etedi. Ekijaqty taýar ainalymynyń kólemi qarqyndy túrde ulǵaiyp kele jatqany aityldy. Onyń kórsetkishi birinshi toqsannyń qorytyndysy boiynsha 30 paiyzǵa artyp, 1 milliard dollardan asqan.
