Memleket basshysy Qasym-Jomart Toqaev Bishkekke resmi sapary barysynda Qyrǵyz Respýblikasynyń Prezidenti Sadyr Japarovpen kelissóz júrgizdi, dep habarlaidy "Ult aqparat" Aqordaǵa silteme jasap.
Kelissózderge deiin Qyrǵyzstan Prezidentiniń «Ala-archa rezidentsiiasy aýmaǵyndaǵy «Aq keme» mármár shatyrynda saltanatty túrde resmi qarsy alý sharasy ótti. Qurmet Qaraýylynyń bastyǵy eki el basshylaryna raport berip, Qazaqstan men Qyrǵyzstannyń ánurandary shyrqalǵannan keiin Qasym-Jomart Toqaev pen Sadyr Japarov bir-birine resmi delegatsiialardyń quramyn tanystyrdy.
Saltanatty rásimnen keiin shaǵyn quramda kezdesý boldy. Qazaqstan Prezidenti baýyrlas Qyrǵyz Respýblikasyna resmi saparmen kelýge shaqyrǵany úshin Sadyr Japarovqa rizashylyǵyn bildirdi.
– Men sizdiń shaqyrýyńyzdy zor rizashylyqpen qabyl aldym. Bul sapardyń máni erekshe. Osy mańyzdy sapar elderimizdiń arasyndaǵy yntymaqtastyqtyń odan ári damýyna zor serpin beretini sózsiz. Sonyń arqasynda strategiialyq seriktestigimiz de nyǵaia túspek. Qyrǵyzstan – Qazaqstanǵa barlyq jaǵynan eń jaqyn el. Ony kúmánsiz aitýǵa bolady. Biyl eki eldiń diplomatiialyq qatynas ornatqanyna 30 jyl tolyp otyr. Osy kezeńde yntymaqtastyq aiasy barynsha keńeiip, dostyǵymyz nyǵaia tústi. Biz barlyq deńgeide ózara senimge negizdelgen saiasi dialog ornattyq. Memleketaralyq, parlamentaralyq jáne úkimetaralyq keńesterimiz bar. Sondai-aq, Syrtqy ister ministrlikteri yqpaldasa jumys atqarýda. Qazaqstan tek Qyrǵyz elimen osyndai tyǵyz bailanys ornatqanyn erekshe atap ótkim keledi, – dedi Memleket basshysy.
Sadyr Japarov óziniń shaqyrýyn qabyl alyp, Qyrǵyzstanǵa resmi saparmen kelgeni úshin Qasym-Jomart Toqaevqa alǵys aityp, Qazaqstan Prezidentiniń bul sapary eki el arasyndaǵy yntymaqtastyqqa tyń serpin beretinin atap ótti.
– Biz – yntymaqtastyǵy jarasqan baýyrlas eldermiz. Eki el arasynda, tipti óńirlerimizdiń deńgeiinde de eshqandai túsinbestik bolǵan emes. Tolyqtai dostyq rýhta birge damyp kelemiz, – dedi Qyrǵyzstan Prezidenti.
Memleket basshylary budan keiin saiasi, saýda-ekonomikalyq jáne mádeni-gýmanitarlyq salalardy keńeitýge erekshe kóńil bóle otyryp, qazaq-qyrǵyz strategiialyq seriktestiginiń aýqymdy máselelerin talqylady. Sonymen qatar aimaqtyq kún tártibindegi problemalar qarastyryldy.
Sondai-aq prezidentter mádeni-gýmanitarlyq bailanystardy odan ári nyǵaitýǵa ózara múddeli ekenderin aitty.
