Memleket basshysy Qasym-Jomart Toqaev koronavirýsqa qatysty testileý kólemin arttyrýdy tapsyrdy, dep habarlaidy "Ult aqparat".
«Epidemiiany aýyzdyqtaý – ońai sharýa emes. Onyń ekonomikaǵa jáne halyqtyń ál-aýqatyna tigizetin saldaryn barynsha azaitý – mańyzdy mindet. Biz jan-jaqty oilastyrylǵan jáne naqty sharalar qabyldaýymyz kerek», - dedi Memleket basshysy koronavirýs indetiniń ekinshi kezeńine daiyndyq máseleleri boiynsha keńeste.
Osy oraida prezident birqatar túitkildi máselelerge toqtaldy.
«Testileý kóleminiń tómendeýi úrdisi baiqalyp otyr. Táýligine 40-tan 60 myńǵa deiin zertteý júrgizý múmkindigi bolǵanymen, ortasha eseppen 18 myń zertteý jasalýda. Zerthanalardyń júktemesi 40 paiyz shamasynda», - dedi Q. Toqaev.
Prezident óńirlik bóliniste kólemdi teńestirýge qol jetkizilmegenin eskertti. Biylǵy 5 qazandaǵy jaǵdai boiynsha 100 myń adamǵa shaqqandaǵy esepteýde testileýdiń tómengi deńgeii Qyzylorda, Almaty oblystarynda, Shymkent qalasynda anyqtalǵan, al joǵary deńgei Atyraý, Batys Qazaqstan oblystarynda tirkeldi.
Zertteýlerdiń eń joǵary kólemi biylǵy maýsym aiynda júrgizilgen, iaǵni táýligine 33 myńǵa jetti. 2020 jylǵy 5 qazanda 11 myńǵa jýyq zertteý jasaldy.
Qazirgi jaǵdaida mundai kórsetkish óte az ekenine toqtalǵan Prezident, «biz naqty ahýaldy bilýimiz kerek. Sondyqtan da testileýden ótkizý kólemin arttyrý boiynsha sharalar qabyldaǵan jón», - dedi.
Memleket basshysynyń aitýynsha, zerthana jelisi keńeitilip, barsha álemde testileý quny tómendegenine qaramastan, elimizde testileý baǵasy áli de joǵary bolyp tur. Bul turǵyda 10-nan 18 myń teńgege deiin jetedi.
«Halyqtyń basym bóligine bul soma tiimsiz bolyp tur dep sanaimyn. Úkimet pen ákimderden testileýdiń qarjylyq máselesin sheshý talap etiledi», - dedi Qasym-Jomart Toqaev.
