Aqorda rezidentsiiasynda Prezident Qasym-Jomart Toqaevtyń tóraǵalyǵymen Konstitýtsiiaǵa ózgerister men tolyqtyrýlar engizý jóninde keńes ótti, dep habarlaidy "Ult aqparat" Aqordanyń resmi saityna silteme jasap.
Jiynǵa Parlament Senatynyń tóraǵasy Máýlen Áshimbaev, Parlament Májilisiniń tóraǵasy Erlan Qoshanov, Memlekettik hatshy Erlan Qarin, Prezident Ákimshiliginiń Basshysy Murat Nurtileý, Ádilet ministri Qanat Mýsin jáne Jumys tobynyń músheleri qatysty.
Memleket basshysy óz sózinde Joldaýda aitylǵan saiasi bastamalardy júzege asyrý úshin Ata zańymyzǵa ózgerister men tolyqtyrýlar engizý kerek ekenin aitty.
– Jumys toby qajetti túzetýlerdi ázirledi. Bul iske belgili zańger ǵalymdar, adam quqyqtary jónindegi ýákil, Parlament jáne memlekettik organdardyń ókilderi atsalysty. Konstitýtsiialyq Sotta, Konstitýtsiialyq Keńeste jumys istegen ǵalymdarymyz bar. Ata zańymyzdyń jańa normalaryn ázirlegende olardyń mol tájiribesi septigin tigizgeni anyq. Ásirese, Konstitýtsiialyq Sotty qurý jáne onyń jumys tártibin retteý máselesi týraly oi-tujyrymdar paidaly boldy, – dedi Prezident.
Qasym-Jomart Toqaev Konstitýtsiiaǵa ózgerister men tolyqtyrýlar engizý úshin daiyndalǵan jobaǵa qoǵamdy saiasi turǵydan transformatsiialaý jóninde berilgen barlyq usynysty eskerýdiń máni zor ekenine toqtaldy.
– Shyn máninde, bul Qazaqstannyń bilik institýttaryn qalyptastyrýdyń jáne yqpaldastyqtyń, jańa saiasi mádenietti engizýdiń múlde jańa modeline kóshkenin bildiredi. Naqty ári tolyq túsinik bolý úshin osy model men úderisti Ekinshi respýblika retinde belgiledim. Jańa paradigmaǵa sáikes Prezidenttiń ókilettigi qysqarady, Parlament pen máslihattardyń róli aitarlyqtai kúsheiedi. Azamattardyń qatysýy edáýir artyp, quqyq qorǵaý salasy júieli túrde nyǵaiady, – dedi Qasym-Jomart Toqaev.
Memleket basshysy adam quqyqtaryn qamtamasyz etýge qatysty túzetýlerdiń mańyzy zor ekenin aitty.
– Azamattardyń konstitýtsiialyq quqyqtary men bostandyqtaryn qorǵaý tetigi edáýir kúsheiedi. Bul sheneýnikterdiń ózderi qabyldaityn aktilerdiń sapasyna degen jaýapkershilikti arttyrady dep sanaimyn. Konstitýtsiialyq deńgeide Adam quqyqtary jónindegi táýelsiz ýákildiń quzyretteri men kepildikteri bekitiledi. Jalpy, ázirlengen ózgertýler men tolyqtyrýlar toptamasyna Joldaýda aitylǵan saiasi bastamalar men Konstitýtsiiaǵa engizilýi qajet túzetýlerdi iske asyrýǵa tiisti normalar ǵana engizilgenin atap ótken jón. Basqa da ózekti ózgertýler konstitýtsiialyq jáne basqa da zańdar aiasynda bekitiledi, – dedi Prezident.
Qasym-Jomart Toqaev memlekettik organdardyń sylbyr jumys isteýine jol berilmeitinin taǵy da eske salyp, sońǵy úsh jylda elimizdegi jáne álemdegi jaǵdaidyń túbegeili ózgergenin aitty.
– Memlekettik apparat kez kelgen ózekti máselege jedel, der kezinde nazar aýdarýy kerek. Sondyqtan Jumys toby usynǵan túzetýler Úkimetke erekshe aktilerdi qabyldaýǵa múmkindik beredi. Bul daǵdarys kezinde jedel áreket etýdi qamtamasyz etedi. Osy oraida, Parlamenttiń qarqyndy jumys istegeni óte mańyzdy. Depýtattar qos palatanyń birlesken otyrysynda zań jobalaryn shuǵyl qaraýy kerek. Jalpy, men Jumys toby daiyndaǵan barlyq ózgerister men tolyqtyrýlardy maquldaimyn, – dedi Memleket basshysy.
Qasym-Jomart Toqaev qoǵam men memleket úshin asa mańyzdy sanalatyn Jerge ielik etý máselesin sheshý qajettigine arnaiy toqtaldy.
– Jerdiń jáne tabiǵi resýrstardyń iesi halyq degen normany Konstitýtsiiada birjola bekitýdiń saiasi máni zor bolmaq jáne bolashaqta bul máseleni ártúrli túsindirýge jol berilmeýi kerek. Osyǵan bailanysty, Negizgi zańnyń 6-babyn mynadai redaktsiiada berý usynylady: «Jer jáne onyń qoinaýy, sý, ósimdikter jáne janýarlar álemi, basqa da tabiǵi resýrstar halyqqa tiesili. Memleket halyq atynan menshik ieligin júrgizýge quqyly», – dedi Prezident.
Memleket basshysy sóziniń sońynda az ýaqytta óte kóp is bitirgeni úshin Jumys tobynyń múshelerine rizashylyǵyn bildirdi.
– Men búgin Konstitýtsiiaǵa ózgerister men tolyqtyrýlar engizý týraly zań jobasyn Konstitýtsiialyq Keńestiń qaraýyna usynamyn. Bul – Ata zańymyzdyń talaby. Konstitýtsiiaǵa engiziletin túzetýler Táýelsiz Qazaqstan tarihynyń kelesi paraǵyn ashady dep senemin. Muny Jańa Qazaqstandy qurý jolyndaǵy mańyzdy beles deýge bolady, – dedi Qasym-Jomart Toqaev.
