Úkimet ákimdermen birlesip, shuǵyl túrde turaqty jumys oryndaryn kóbeitýge kirisýi kerek. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat" Aqorda baspasóz qyzmetiniń Twitter-degi paraqshasyna silteme jasap.
«Biz «Jumyspen qamtý jol kartasyn» qabyldadyq. Ony júzege asyrý úshin 1 trln teńge qarjy bóldik. Biraq josparda kórsetilgendei 255 myń emes, 150 myńǵa jýyq adam ǵana jumysqa ornalasty. Jobalardyń deni, negizinen, jóndeý jumystaryna baǵyttalǵan», - dep atap ótti Qasym-Jomart Toqaev.
Memleket basshysynyń aitýynsha, jobalardyń 6 paiyzynda ǵana turaqty jumys orny qarastyrylǵan.
«Onyń ózinde memlekettik sektorlarda, iaǵni mektepter men aýrýhanalarda. Mundai jumys meni qatty alańdatady. Úkimet ákimdermen birlesip, shuǵyl túrde turaqty jumys oryndaryn kóbeitýge kirisýi kerek», - dedi Prezident.
