Foto: Aqorda
Memleket basshysy Qasym-Jomart Toqaev Halyqaralyq jastar kúnine arnalǵan Jastar Fest forýmyna qatysýshylarǵa quttyqtaý sózin joldady, dep habarlaidy Ult.kz.
Prezident óz sózinde jastardyń el damýyna qosyp jatqan úlesin joǵary baǵalap, volonterlik qyzmetten bastap sport pen bilim salasyndaǵy jetistikterin atap ótti. Toqaevtyń aitýynsha, eńbekqorlyq, bilimpazdyq, janashyrlyq pen jaýapkershilik – jas býyn boiynda bolýy tiis eń mańyzdy qasietter.
Biyl Qazaqstanda Jumysshy mamandyqtary jyly ótip jatqanyn eske salǵan Memleket basshysy eńbek adamyna degen qurmetti arttyrýdyń mańyzdylyǵyn aitty. Ol jastardyń ózgeristerdiń aldyńǵy shebinde bolyp, ózin-ózi damytýǵa umtylýyn erekshe atap ótti.
Prezident elimizde jastarǵa bilim alý, jumysqa ornalasý, kásipkerlikti damytý, baspana alý jáne saiasi ómirge aralasý úshin keń múmkindikter jasalyp otyrǵanyn jetkizdi. Onyń aitýynsha, bul igilikterden 600 myńnan astam jas qazaqstandyq paidalanyp otyr.
«Qazaqstan jastary – kózi ashyq, kókiregi oiaý, oiy ushqyr, jasampaz azamattar. Elimizdiń jarqyn bolashaǵy – óskeleń urpaqtyń qolynda. Men sizderge senemin», – dedi Toqaev.
Jastar Fest forýmy Pavlodar qalasynda ótip jatyr.
