Memleket basshysy Qasym-Jomart Toqaev Halyqaralyq shahmat federatsiiasynyń prezidenti Arkadii Dvorkovichti qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaev Arkadii Dvorkovichti Halyqaralyq shahmat federatsiiasynyń (FIDE) prezidenti laýazymyna jýyrda qaita sailanýymen quttyqtady.
Kezdesý barysynda Memleket basshysyna Astanada álemniń 12 myqty shahmatshysynyń basyn qosqan FIDE Gran-pri áielder seriiasynyń birinshi kezeńiniń ótkizilýi týraly málimet berildi. Qasym-Jomart Toqaev osyndai deńgeidegi is-sharalardy ótkizý elimizdegi shahmat sportynyń damýyna eleýli úles qosatynyn atap ótti.
"Qazaqstanda shahmat keńinen tanymal, ásirese balalar men jastar arasynda. Bizde 7 myńnan astam sektsiia jumys isteidi, degenmen bul kórsetkishti keminde eki ese arttyrýǵa tiispiz. Qazir shahmatpen 200 myńnan astam adam ainalysady. Qazaqstandyq shahmatshylar halyqaralyq jarystarda sátti óner kórsetip júr. Biz bul sportty qoldaýǵa basa mán beremiz. Shahmatty damytýdyń Jol kartasy ázirlendi. "Mekteptegi shahmat" aýqymdy jobasyn júzege asyrýdy josparlap otyr", – dedi Memleket basshysy.
Óz kezeginde Arkadii Dvorkovich Qazaqstanda shahmatty jeke qoldaǵany jáne tanymal sportqa ainaldyrǵany úshin Qasym-Jomart Toqaevqa rizashylyǵyn bildirip, FIDE shahmatty mektep baǵdarlamasyna engizý jónindegi halyqaralyq tájiribesin bólisýge daiyn ekenin jetkizdi.
Sonymen qatar olar Qazaqstan men FIDE arasyndaǵy uzaq merzimdi yntymaqtastyq máseleleri jóninde pikir almasyp, elimizde iri halyqaralyq týrnirler ótkizý perspektivalaryn talqylady.
