Memleket basshysy koronavirýs pandemiiasynyń taralýyna bailanysty elimizde Tótenshe jaǵdai jariialanyp, elordada karantin engizilgennen keiin Jibek joly aýyly mańyna qoiylǵan №6 baqylaý-ótkizý beketine baryp, jumysymen tanysty, dep habarlaidy "Ult aqparat".
Qazaqstan Prezidenti karantin rejimin qamtamasyz etetin qala ákimdiginiń, densaýlyq saqtaý, ishki ister organdarynyń, Qorǵanys ministrligi men Ulttyq gvardiianyń áskeri qyzmetshileriniń daiyndyǵyna oń baǵa berdi.
Qasym-Jomart Toqaev elorda ákiminiń, Densaýlyq saqtaý, Ishki ister, Qorǵanys ministrleriniń koronavirýs indetine qarsy kúresý úshin qabyldaǵan sharalary jaiyndaǵy esepterin tyńdady.
Elimizdegi meditsina qyzmetkerleriniń pandemiiaǵa qarsy kúrestegi aýyr eńbegin atap ótken Memleket basshysy, olarǵa rizashylyǵyn bildirip, eńbekaqylary men syiaqylaryn ýaqytyly ári tolyq kólemde berýdiń mańyzdy ekenin atap ótti.
Prezident Qasym-Jomart Toqaev Premer-Ministr Asqar Maminge asa qolaisyz álemdik koniýktýra jaǵdaiynda ekonomikany basqarýdyń jańa ádisterin ázirleý qajettigin aitty.
– Kez kelgen qolaisyz jaǵdaiǵa, tipti asa kúrdeli ahýalǵa, sondai-aq, ekonomikany mobilizatsiialaityn qadamǵa da ázir bolýymyz kerek. Qysqasy, saqadai sai bolǵan jón, – dedi Qasym-Jomart Toqaev.
Memleket basshysy Qorǵanys ministrliginiń áskeri qyzmetshilerine, Ishki ister ministrligi men basqa da vedomstvo qyzmetkerlerine tabys tilep, karantin engizýdiń sebepterin túsindirdi.
– Qazirgi jaǵdaida karantin engizbese bolmaidy. Álemde ne bolyp jatqanyn kórip otyrsyzdar. Mundai kezde naqty áreket jasap, uiymshyldyq tanytý kerek. Sondyqtan karantin engizý siiaqty tásilderdi qoldanýǵa týra keledi. Azamattarymyz qabyldanǵan sharalarǵa túsinistikpen qaraidy dep oilaimyn. Munyń bári halqymyzdyń densaýlyǵyn saqtaý úshin istelip otyr, – dedi Memleket basshysy.
QR Prezidenti Teleradiokesheni jariialaǵan videoda Nur-Sultan qalasynyń ákimi Qasym-Jomart Toqaevqa qaladaǵy jaǵdai týraly baiandaidy.
Altai Kólginov qazirgi ýaqytqa deiin qalaǵa 3600-den astam avtokólik kirgenin málim etti. Olarmen Nur-Sultan qalasynyń turǵyndary men tranzit arqyly ketetinder kelgen. Tranzitpen kelgender qalaǵa kirmei, ainalma jol arqyly shyǵyp ketip jatyr.
«Elordada qazirgi ýaqytta 47 myń tonna astyq bar. Ailyq qajettilik – 38 myń tonna. Eń mańyzdy azyq-túlik boiynsha baǵany turaqtandyryp jatyrmyz. Azamattarǵa qajet bolmaǵan jaǵdaida kóshege artyq shyǵýdyń qajeti joq dep aitýdamyz», - dedi Prezidentke elorda ákimi.
Óz kezeginde Densaýlyq saqtaý ministri Eljan Birtanov búginde Nur-Sultanda 7 naýqastyń anyqtalǵanyn jetkizdi.
Ministrdiń aitýynsha olarmen bailanysta bolǵandardy anyqtaý jumystary júrgizilýde. Dárigerler qalaǵa kirip jatqan azamattardyń temperatýrasyn ólshep, qolyna koronavirýs jaily anyqtama paraǵyn berýde.
