Memleket basshysy ál-Farabi atyndaǵy Qazaq ulttyq ýniversitetiniń rektory Janseiit Túimebaevty qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa oqý ornynyń bir jylda atqarǵan jumystary men aldaǵy damý jospary tanystyryldy.
Sondai-aq rektor Memleket basshysyna bilim berý úderisi, ǵylymi-zertteý jumystary jáne ýniversitettiń halyqaralyq jetistikteri týraly baiandady.
Kezdesý barysynda Janseiit Túimebaev Prezidentke ǵylymi jobalardyń tiimdiligi men kadrlardyń áleýetin arttyrý jáne oqý ordasynyń 90 jyldyǵy qarsańynda QazUÝ qalashyǵyn qaita jańǵyrtý jónindegi usynysyn jetkizdi.
Onyń aitýynsha, 2024 jylǵa qarai ýniversitet elimizdiń ǵylymi-tehnikalyq damýynyń perspektivti degen baǵyttary boiynsha 650-den astam ǵylymi jobany qolǵa almaq.
Rektor ǵylymi jobalardyń nátijelerin ekonomikanyń naqty sektoryna ainaldyrý 20-ǵa jýyq spin-off kompaniialaryn qurý arqyly júzege asyrylatynyn aitty.
Janseiit Túimebaev jetekshi oqý ornyndaǵy uzaq jyldardan beri qordalanǵan máselelerge de toqtalyp, olardy sheshý joldary týraly usynysyn jetkizdi.
Atap aitqanda, eskirgen jataqhanalar men tozyǵy jetken oqý korpýstarynyń jai-kúii, 2 myńnan astam oqytýshy men qyzmetkerdiń baspanaǵa muqtajdyǵy jóninde baiandady.
Kezdesý sońynda Prezident bilim sapasyn túbegeili jaqsartý jáne elimizdiń áleýmettik-ekonomikalyq damýyna ǵylymnyń qosatyn úlesin arttyrý máselelerine nazar aýdaryp, ýniversitet basshysynyń usynystaryn qoldady.
