Foto: Aqorda
Memleket basshysy Qasym-Jomart Toqaev «Qazaqstan temir joly» ulttyq kompaniiasy» AQ basqarma tóraǵasy Talǵat Aldybergenovti qabyldady. Kezdesý barysynda Prezidentke kompaniianyń ótken jylǵy qyzmetiniń qorytyndylary men aldaǵy kezeńge arnalǵan josparlary tanystyryldy, dep habarlaidy Ult.kz.
Qasym-Jomart Toqaevke berilgen málimetke sáikes, 2025 jyly tariftik júk ainalymy 10 paiyzǵa artyp, 289 milliard tonna-shaqyrymdy quraǵan. Al tasymal kólemi 5,5 paiyzǵa ulǵaiyp, 320 million tonnaǵa jetken. Eksporttyq tasymal 89 million tonnadan asyp, júk tranziti 20 paiyzdan astam ósip, 33 million tonna bolǵan.
Talǵat Aldybergenov byltyr paidalanýǵa berilgen Dostyq – Moiynty temir jolynyń ekinshi jelisi arqyly 6 million tonna nemese 100 myńnan astam vagon júk tasymaldanǵanyn baiandady. Sondai-aq Almaty beketin ainalyp ótetin temir jol ýchaskesinde tehnikalyq qozǵalysqa ruqsat etilgenin aitty.
Kezdesýde temirjol infraqurylymyn tartý jáne jańǵyrtý jumystary jalǵasyp jatqany atap ótildi. Qazirgi tańda júzege asyrylyp jatqan jobalardyń jalpy uzyndyǵy 3900 shaqyrymdy quraidy. Kompaniia qyzmetinde qaýipsizdik, tiimdilik pen ashyqtyqty arttyrý maqsatynda jasandy intellekt negizindegi tsifrlyq jobalar engizilip jatyr.
Sonymen qatar tálimgerlik institýty jolǵa qoiylyp, jastardyń kadrlyq rezervi jasaqtalǵany aityldy.
Prezident temirjol salasyndaǵy áleýmettik máselelerdi sheshýdiń mańyzyn atap ótip, temirjolshylarǵa arnalǵan qoljetimdi turǵyn úi salý bastamasyn qoldady. Memleket basshysy «Qazaqstan temir joly» ulttyq kompaniiasyn transformatsiialaýdy jalǵastyrý, iri sheteldik kompaniialarmen yntymaqtastyqty kúsheitý, tsifrlyq sheshimderdi keńinen engizý jáne mýltimodaldyq logistikany damytý úshin infraqurylymdy keńeitý jóninde naqty tapsyrmalar berdi.
