Memleket basshysy halyqaralyq kompaniialardyń ókilderimen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidenti Qasym-Jomart Toqaev Aqorda rezidentsiiasynda shet memleketterdiń iri investitsiialyq kompaniialary ókilderimen kezdesti. Jiynda Memleket basshysy sheteldik investitsiialar Qazaqstan damýynyń negizgi faktorlarynyń birine ainalǵanyn, sondyqtan elimiz investitsiialyq ahýaldy jaqsartýǵa erekshe kóńil bóletinin atap ótti.
– Bul saladaǵy júieli ári jan-jaqty jumystar bizdi Ortalyq Aziiadaǵy eń iri, postkeńestik keńistikte jyldam damyp kele jatqan ekonomikalardyń birine ainaldyrdy. Táýelsizdik jyldary shetelden 370 milliard dollardan astam tikelei investitsiia tarttyq. Memleket investorlardy barlyq jaǵynan qoldaýǵa basymdyq beredi. Biz árbir investordy jeke ári keshendi qoldaý qaǵidatyn engizdik, – dedi Qasym-Jomart Toqaev.
Prezident tikelei ózi tóraǵalyq etetin Sheteldik investorlar keńesiniń investorlarmen ózara yqpaldasý úshin negizgi alań ekenin atap ótti. Naqty sektorǵa tikelei investitsiia tartýdan bólek qundy qaǵazdar naryǵyn damytý men sheteldik portfeldi investorlardy elge ákelýge erekshe kóńil bólinip keledi. Memleket basshysy Qazaqstannyń aimaqtaǵy iri kapital naryǵyn qurap otyrǵanyn jetkizdi.
– Ulttyq bank negizgi qarjylyq retteýshi retinde qor naryqtaryn odan ári damytý jolynda belsendi jumys istep jatyr. Qazaqstanda bul salanyń quqyqtyq jáne infraqurylymdyq baǵyty jetildirilgen. Elimizde eki qor birjasy – Almatydaǵy KASE jáne Astana halyqaralyq qarjy ortalyǵy tabysty qyzmet atqaryp keledi, – dedi Memleket basshysy.
Prezidenttiń aitýynsha, álemdegi jetekshi ýran óndirýshi «Qazatomónerkásip» kásiporyny men qarjy tehnologiiasy boiynsha aimaqtaǵy kóshbasshy Kaspi.kz IPO-lary kapital naryǵynyń dinamikasyn arttyryp, ilgerileýine úles qosty.
Qasym-Jomart Toqaev qazir elimizde jekeshelendirý boiynsha aýqymdy jumystar atqarylyp jatqanyn aitty.
– Qazirgi ýaqytta Qazaqstan ekonomikasynyń munai-gaz, energetika, infraqurylym jáne basqa da salalarynda 700-den astam memlekettik kásiporyndy jekeshelendirý boiynsha aýqymdy jumystar júrgizilýde. Biz iri kompaniialardyń aktsiialarynyń ulttyq qor birjalarynda tirkelgenin qup kóremiz, – dedi Memleket basshysy.
Prezident búgingi kezdesý qazaqstandyq kapital naryqtaryna sheteldik investitsiialardy kóptep tartý týraly pikir almasýǵa tamasha múmkindik beretinin aitty. Sonymen qatar Qasym-Jomart Toqaev osyndai keleli jiyndy turaqty túrde ótkizýdiń mańyzdy ekenin atap ótti.
Jiynda «Blackrock», «Luxor Capital», «Lugard Road Capital», «Aberdeen Asset Management», «Capital Group», «Sands Capital», «Alameda Research & FTX», «Kingsway Capital» kompaniialarynyń jetekshileri sóz sóiledi.
