Prezident Qasym-Jomart Toqaev birqatar memlekettiń elshilerinen senim gramotalaryn qabyldady, dep habarlaidy Aqorda.
Aqorda rezidentsiiasynda 10 memlekettiń tótenshe jáne ókiletti elshileriniń Qazaqstan Prezidentine senim gramotalaryn tapsyrý rásimi ótti.
Senim gramotalaryn Kýba elshisi Oskar Santana Leon (rezidentsiiasy Nur-Sultan qalasynda), Bangladesh elshisi Kamrýl Ahsan, Dominikan Respýblikasynyń elshisi Frank Gans Dannenberg Kastelianos, Argentina elshisi Edýardo Antonio Zýain, Perý elshisi Hýan Henaro del Kampo Rodriges, Nigeriia elshisi Iakýbý Santýraki Sýleiman, Laos elshisi Vilavan Iiapohe, Chad elshisi Adam Beshir Mahamýd, Rýanda elshisi Fidelis Ntampaka Mironko, Benin elshisi Akambi Andre Okýnlola-Biaý tapsyrdy.
Memleket basshysy elshilerdi Qazaqstandaǵy diplomatiialyq missiialarynyń resmi bastalýymen quttyqtap, elimizdegi igi mindetterin oryndaý barysynda olarǵa Prezident Ákimshiligi men Qazaqstan Úkimeti tarapy jan-jaqty qoldaý kórsetetinin jáne kómektesetinin aitty.
Qasym-Jomart Toqaev óz sózinde álemniń sońǵy otyz jyl ishinde eń kúrdeli geosaiasi jáne geoekonomikalyq ahýaldy bastan ótkerip otyrǵanyn aitty. Onyń aitýynsha, koronavirýs pandemiiasy elderimiz úshin aitarlyqtai synaq boldy. Sonymen qatar halyqaralyq qatynastardaǵy ahýaldyń shielenisýi álemniń damýyna keri áser etip otyr. Osyǵan bailanysty Qazaqstan Prezidenti qaqtyǵystardyń BUU Jarǵysyna sáikes tezirek jáne ádil retteletinine senimdi ekenin jetkizdi.
Memleket basshysy kópultty jáne kópkonfessiialy Qazaqstan damýdyń jańa kezeńine qadam basqanyn atap ótti.
«Biz demokratiialyq ózgeristerdiń jańa dáýirine ótkenimizdi jariialap, memlekettik bilikti buryn-sońdy bolmaǵan ortalyqsyzdandyrýǵa, úilesimdi jáne tepe-teńdik júiesin nyǵaitýǵa kiristik», – dedi Prezident.
Qasym-Jomart Toqaev elimizde sheteldik investorlar men saýda jónindegi seriktesterdiń Qazaqstan ekonomikasyna degen senimin nyǵaitýǵa basa mán beriletinine toqtaldy.
«Bizdiń Úkimet ulttyq ekonomikanyń ashyqtyǵyna, kelisimsharttarǵa qol suǵylmaýyna jáne jemqorlyqpen aiaýsyz kúreske beiildiligin saqtaidy. Bul reformalar halqymyzdyń tarihyndaǵy betburys kezeńdi bildiredi. Biz turalap qalý emes, qarqyndy damý jolyn tańdaimyz», – dedi Qasym-Jomart Toqaev.
Prezident shyn máninde básekege qabiletti, demokratiialyq jáne áleýmettik memleket qurý úshin álemniń barlyq elimen ózara tiimdi ári dostyq qarym-qatynastardy nyǵaitýǵa nietti ekenimizdi aitty.
Rásim sońynda Memleket basshysy diplomattarǵa tabys tilep, olardyń memleketteriniń basshylaryna júrekjardy sálemin joldady. Sondai-aq jiynǵa qatysýshylardy qasietti Ramazan aiymen, Pasha merekesimen jáne Laos Jańa jylymen quttyqtady.
