Ulytaýda Memleket basshysy Qasym-Jomart Toqaevtyń tóraǵalyǵymen Ulttyq quryltaidyń I otyrysy bastaldy, - dep habarlaidy "Ult aqparat" Aqordanyń Telegram arnasyna silteme jasap.
Prezident barsha qazaqstandyqty Ulttyq quryltaidyń ashylýymen quttyqtady.
«Biz búgin jalpyulttyq referendýmnan keiin alǵash ret bas qosyp otyrmyz. Ata zańǵa ózgerister engizýge arnalǵan referendým tabysty ótti. Azamattarymyz daýys berýge belsene qatysty. Otbasymen birge baryp, el bolashaǵyna bei-jai qaramaitynyn kórsetti.
Shynaiy ózgeriske jáne jan-jaqty jańǵyrýǵa degen umtylysyn bildirdi. Keleshegimizdiń jarqyn bolaryna úmiti jáne senimi zor ekenin baiqatty. Elimiz erteńgi kúnge myzǵymas birlikpen qadam basýǵa daiyn ekenin anyq ańǵartty», - dedi Toqaev.
Memleket basshysy Qazaqstan Respýblikasynyń resmi ataýyn ózgertý týraly da pikir bildirdi.
«Keibir azamattarymyz referendým kezinde memlekettiń ataýy da ózgerýge tiis edi degen pikir aityp júr. Olar «Qazaqstan» ataýyndaǵy «-stan» sózin elimizge de, búkil Aziiaǵa da jat uǵym dep sanaidy. Muny da qisyndy dep aitýǵa bolmaidy. Sebebi, álemde dál osyndai Pákistan, Úndistan, Aýǵanstan jáne Ortalyq Aziia memleketteri bar.
Eń basty másele, biz Táýelsiz elimiz – Qazaqstan Respýblikasy atynan 30 jyl ishinde kóptegen halyqaralyq kelisimsharttarǵa qol qoidyq, memlekettik shekaramyzdy bekittik. Osyndai jaǵdaida memleketimizdiń ataýyn ózgertý jaýapsyz sheshim bolar edi. Bul – eń aldymen, ulttyq qaýipsizdigimizge jáne halqymyzdyń beibit ómirine tikelei áseri bar óte mańyzdy másele», - dedi Qasym-Jomart Toqaev.
