Qasym-Jomart Toqaev Qazaqstan-Amerika investitsiialyq dóńgelek ústeliniń jumysyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Isker toptarmen birqatar ekijaqty kezdesýler aiaqtalǵannan keiin Memleket basshysy Qazaqstan-Amerika investitsiialyq dóńgelek ústeliniń jumysyna qatysty.
Is-sharaǵa Chevron, ExxonMobil, Fluor, Shell USA, The Solar Turbines, S&P Global, Centrus Energy Corporation, Boeing, Amway, GE International Markets, Honeywell UOP, Philip Morris, The Procter & Gamble Company, Baker Hughes, John Deere, Bechtel, Halliburton, Valmont, Champion Foods, PepsiCo, MasterCard, Citi, McLarty Associates, Macro-Advisory LTD, private equity fund RCF, Brownstein Hyatt Farber Schreck, Greenenberg Traurig LLP, Microsoft, Coursera, StartX, EPAM, Wabtec Corporation, Zscaler, DoorDash, Amazon, Pfizer, Medtronic, Netflix sekildi iri amerikalyq kompaniialardyń basshylary qatysty.
Prezident mundai formatta ótken kezdesý igi dástúrge ainalǵanyn atap ótip, osy sharany uiymdastyrýǵa atsalysqan AQSh-tyń Saýda palatasy men Iskerlik keńes múshelerine rizashylyǵyn bildirdi.
Memleket basshysy kezdesýde Ádiletti Qazaqstan qurýǵa baǵyttalǵan aýqymdy saiasi jáne ekonomikalyq reformalardyń júzege asyrylýy jóninde egjei-tegjeili aityp berdi.
Qasym-Jomart Toqaev Qazaqstannyń ekonomikalyq áleýeti men investitsiialyq tartymdylyǵyn arttyrý úshin qabyldanyp jatqan sharalar týraly jan-jaqty málimet berdi. Atap aitqanda, Prezident energetika, aýyl sharýashylyǵy, ónerkásip, kólik-logistika, tsifrlandyrý, qarjy jáne jańartylatyn energiia kózderi salalaryndaǵy birlesken investitsiialyq jobalardy iske asyrý múmkindikterine toqtaldy.
Memleket basshysy Qazaqstanda amerikalyq jańa iri kásiporyndardyń paida bolýyna qoldaý bildirdi.
Qasym-Jomart Toqaev Qazaqstan men AQSh arasyndaǵy strategiialyq ekonomikalyq seriktestik barlyq salada ártaraptandyrylyp, keńeie beretinin atap ótti.
– Meniń komandamnyń investitsiia tartýdaǵy tájiribesi mol. Bul kompaniialaryńyzǵa aimaqtyń eń jyldam damyp kele jatqan ekonomikalarynyń birinde biznes júrgizýdi jeńildetedi. Búgingi kezdesý saýda-ekonomikalyq jáne investitsiialyq yntymaqtastyqty ilgeriletýde, sondai-aq Qazaqstan men AQSh arasyndaǵy strategiialyq seriktestikti odan ári nyǵaitýda naqty qadam bolady dep senemin, – dedi Qazaqstan Prezidenti.
