Qazaqstan Prezidenti Óndirýshi salalardaǵy máseleler jónindegi jahandyq dóńgelek ústel otyrysynda beine úndeý jasady, dep habarlaidy "Ult aqparat" Aqordanyń baspasóz qyzmetine silteme jasap.
BUU Bas hatshysy Antoniý Gýterrishtiń bastamasymen ótken virtýaldy is-sharaǵa memleketter men úkimetterdiń basshylary, halyqaralyq uiymdardyń jetekshileri, iskerlik toptardyń ókilderi men sarapshylar qatysty.
Qasym-Jomart Toqaev óz sózinde koronavirýstan keiingi qaita qalpyna keltirý isi qorshaǵan ortany qorǵaý máselesin halyqaralyq kún tártibindegi eń ózekti problema retinde qoiýǵa jaqsy múmkindik beredi degen pikir aitty.
Memleket basshysy Qazaqstannyń kómirteginen ada ekonomikany damytýdyń balamasy joq degen ustanymda ekenin jetkizdi. Onyń aitýynsha, Qazaqstan TMD-da Parij kelisimin birinshi bolyp ratifikatsiialap, Ornyqty damý maqsatyna qol jetkizýge baǵyttalǵan belsendi klimattyq saiasatty alǵash qabyldaǵan el boldy.
Prezident Qazaqstannyń 2060 jylǵa qarai kómirteginen taza el bolýǵa qol jetkizýge nietti ekenin eske saldy. Bul bastama 2020 jyly jeltoqsanda ótken Klimattyń ózgerýine bailanysty mańyzdy mindetter jónindegi sammit barysynda aityldy.
Qasym-Jomart Toqaev Qazaqstannyń álemde eń kóp energiia paidalanatyn el ekenine nazar aýdardy. Óitkeni ónerkásiptiń 50 paiyzyn óndirýshi sektor quraidy. Elektr energiiasyn óndirýdiń shamamen 70 paiyzy burynǵysha kómirge táýeldi bolyp otyr.
Osyǵan bailanysty Memleket basshysy Qazaqstannyń ornyqty damýynda óndirýshi ónerkásiptiń ekologiialyq talaptarǵa sai bolýyn basty mindet jáne zor basymdyq dep atap ótti.
Prezidenttiń aitýynsha, qazirgi ýaqytta Qazaqstandy 2050 jylǵa deiin kómirtegin az paidalanyp, damytý tujyrymdamasy ázirlenip jatyr.
– Kómir jaǵý saldarynan týyndaityn energetikalyq teńgerimge táýeldilikti azaitý úshin gaz jáne sý energetikasyn damytý, jańartylatyn qýat kózderin paidalaný siiaqty negizgi basymdyqtardy sheshýge baǵyttalǵan elektr energetikasyn damytý jónindegi Ulttyq joba ázirlenedi. Budan bólek aldaǵy bes jyl ishinde Qazaqstanda 2 milliardqa deiin aǵash otyrǵyzylady, – dedi Qasym-Jomart Toqaev.
Memleket basshysy BUU Bas hatshysy Antoniý Gýterrishtiń álem endi burynǵydai bolmaidy degen sózin qoldady. Bul rette Qasym-Jomart Toqaev birde-bir memlekettiń artta qalmaýy úshin belsendi túrde halyqaralyq kúshti jumyldyrýǵa shaqyrdy. Al 2030 jylǵa deiingi ornyqty damý maqsattaryna qol jetkizýge baǵyttalǵan kún tártibi tolyq iske asyrylýǵa tiis.
– Saliqaly saiasat pen investitsiialardyń arqasynda biz barynsha jahandyq jasyl ekonomikaǵa qarai bet bura alamyz. Bul maqsatqa qol jetkizý úshin jekemenshik, sondai-aq, memlekettik sektorlar esebinen qajetti qarjy resýrstaryn jumyldyrý mańyzdy. Biz «COVID-19 pandemiiasy kezeńinde damýdy qarjylandyrý salasyndaǵy halyqaralyq kúsh-jigerdi jumyldyrý» aiasynda kópjaqty is-qimyldy úilestirýdi qoldaimyz, – dedi Qazaqstan Prezidenti.
Qasym-Jomart Toqaev naqty ári ekologiialyq qaita qalpyna keltirý isi 2030 jylǵa deiingi ornyqty damýdyń kún tártibi men Parij kelisiminde kórsetilgen mindetterdiń ajyramas bóligi ekenin atap ótti.
Memleket basshysynyń pikirinshe, 2021 jyl klimattyń jyldam ózgerýin jáne qorshaǵan ortanyń buzylýyn baiaýlatýǵa múmkindik berip otyr.
– Qorshaǵan ortany qorǵaýǵa baǵyttalǵan igi sharalardy saýda jáne investitsiialarǵa qarsy qoldanylatyn kedergige ainaldyrmaý asa mańyzdy. Men Qazaqstannyń osy igi bastamalardy naqty qoldaitynyn rastaimyn, – dedi Prezident.
