QR Prezidenti Qasym-Jomart Toqaev radio qyzmetkerelerin Qazaq radiosynyń 100 jyldyǵymen jáne kásibi merekemen quttyqtady, dep habarlaidy "Ult aqparat".
«Barshańyzdy Qazaq radiosynyń ǵasyrlyq mereitoiymen quttyqtaimyn! Bul-búkil elimizge ortaq qýanysh.
Qazaq radiosynyń jylnamasy – halqymyzdyń júz jylda júrip ótken jolynyń ainasy. Radio alǵash qurylǵan kúnnen bastap el múddesine qyzmet etip keledi. Qazir de táýelsizdiktiń qadir-qasieti men ulttyq qundylyqtardy jastardyń sanasyna sińirýge súbeli úles qosýda.
Birneshe býyn urpaq úshin radio aqparattyń ǵana emes, rýhaniiattyń da qainar kózi boldy. Halqymyzdyń birtýar perzentteriniń daýysy men án-kúileri qara shańyraqtyń qazynaly qorynda saqtaýly tur. Bul - bizdiń baǵa jetpes asyl muramyz.
Táýelsizdigimizdiń 30 jyldyǵyna tuspa-tus kelgen búgingi mereitoidyń orny bólek. Biyldan bastap 1 qazan «Radio kúni» bolyp bekitildi. Munyń ózi bul salanyń aqparat aidynyndaǵy róli erekshe ekenin ańǵartady.
Qazaq radiosy keleshekte de maǵynaly ári mazmundy habarlarymen ulttyń jadyn jańǵyrtyp, memlekettigimizdi nyǵaitýǵa atsalysa beredi dep senemin!
Barshańyzǵa zor densaýlyq, baq-bereke, shyǵarmashylyq shabyt tileimin!», - delingen quttyqtaýda.
