Qasym-Jomart Toqaev Ulttyq dombyra kúnine arnalǵan kontsertke bardy, dep habarlaidy "Ult aqparat" Aqordaǵa silteme jasap.
Memleket basshysy Nur-Sultan qalasynyń bas alańynda biyl ekinshi ret uiymdastyrylyp otyrǵan Ulttyq dombyra kúnine arnalǵan saltanatty jiynǵa qatysty. Qasym-Jomart Toqaev elorda turǵyndary men qonaqtary aldynda sóilegen sózinde barsha qazaqstandyqtardy Ulttyq dombyra kúnimen quttyqtap, bul meiramdy rýhaniiatqa degen zor qurmet, barshamyzǵa ortaq qundylyqty ulyqtaý dep túsiný kerek ekenin aitty.
– Qazaq pen dombyra – egiz uǵym. Aqyn Qadyr aǵamyz qasietti dombyramyzdy "naǵyz qazaq" dep jyrlaǵan. Kúmbirlegen dombyranyń úni batyrlarymyzǵa rýh, aqyndarymyzǵa shabyt bergen. Dombyra árbir qazaqtyń rýhyn kókke kóteretin qundy qazynamyz bolýǵa tiis, – dedi Qazaqstan Prezidenti.
Memleket basshysy Ulttyq dombyra merekesi jas urpaqtyń dástúrli ónerge degen qurmetin arttyratynyna senim bildirdi.
– «Saryarqa», «Balbyraýyn», «Adai», «Álqissa» kúileri – ulttyq rýhymyzdy kóteretin tańǵajaiyp týyndylar. Dombyranyń pernesinen shyqqan kúide halqymyzdyń tereń tarihy bar. Biz atadan balaǵa amanat bolǵan asyl muramyzdy saqtap, qadir tutýymyz qajet. Qurmanǵazy, Dáýletkerei, Táttimbet, Dina, Nurǵisalar bastaǵan kúishilik dástúrdi elimizdiń daryndy jastary jalǵastyryp keledi, – dedi Qasym-Jomart Toqaev.
Qazaqstan Prezidenti búginde dombyra búkil Qazaqstan halqyn biriktiretin teńdesi joq mádeni mura sanalatynyn jáne rýhani jańǵyrý jolynyń negizgi arqaýy ekenin atap ótti. Sondyqtan, bul ulttyq ónerdi keńirek nasihattaýǵa shaqyrdy.
– «Óner – ult kelbeti» deidi dana halqymyz. Barshamyzǵa ortaq qundylyq – dombyrany jan-jaqty nasihattap, jas urpaqtyń sanasyna sińirý óte mańyzdy. Dombyra aspaby – qaitalanbas asyl dúnie. Sondyqtan, mektepte dombyra úirený sabaqtaryn engizý – qajetti ári durys bastama. Sebebi, qazirgi jappai jahandaný ýaqytynda halqymyzǵa tán biregei qundylyqtardy jańǵyrta berýimiz qajet, – dedi Memleket basshysy.
Sóz sońynda Qazaqstan Prezidenti tól mádenietimizge degen qamqorlyq árqashan memlekettiń airyqsha nazarynda bolatynyn aitty.
«Qazaq eli» monýmenti alańynda ótken ulttyq rýhaniiatymyzdy dáripteitin kontsert barysynda myńnan astam ónerpaz bir orkestrdei dombyramen qazaqtyń belgili kúilerin oryndady.
