Qasym-Jomart Toqaev pen Shavkat Mirziioev keńeitilgen quramda ekijaqty kelissóz júrgizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev pen Shavkat Mirziioev shaǵyn quramda ótken mazmundy kezdesýden keiin eki eldiń resmi delegatsiialary músheleriniń qatysýymen kelissózdi keńeitilgen quramda jalǵastyrdy.
Prezidentter saýda-ekonomikalyq yntymaqtastyqty nyǵaitý, onyń ishinde ózara taýar ainalymyn arttyrý, investitsiia tartý jáne ónerkásip, aýyl sharýashylyǵy, qurylys, kólik salalary boiynsha kooperatsiiany damytý máselelerine basa mán berdi. Sondai-aq sý-energetikalyq jáne mádeni-gýmanitarlyq salalardaǵy ózara yqpaldastyq máselesi talqylandy.
Qasym-Jomart Toqaev myzǵymas dostyqqa, tatý kórshilik pen strategiialyq yqpaldastyqqa negizdelgen Qazaqstan men Ózbekstan arasyndaǵy kópjaqty bailanystardyń qarqyndy damyp kele jatqanyn atap ótti.
– Birlesken kúsh-jigerimizdiń arqasynda qazaq-ózbek yntymaqtastyǵy barlyq salada buryn-sońdy bolmaǵan shyńdarǵa kóterildi. Qurmetti Shavkat Miromonovich, osy oń úrdiske Siz súbeli úles qostyńyz, – dedi Memleket basshysy.
Qazaqstan Prezidenti búginde eki el memleketaralyq seriktestiktiń jarqyn úlgisine ainalǵan berik ári úilesimdi qarym-qatynas ornatqanyn aitty. Barlyq deńgeide belsendi ári asa senimdi saiasi dialog ornatylǵan. Úkimet deńgeiindegi júieli jumystar júrgizilip jatyr jáne parlamentaralyq bailanystar da nyǵaiyp keledi. Taraptar kópjaqty qurylymdar men tetikter aiasynda ózara tabysty jumys istep jatyr. Qazaqstan men Ózbekstannyń aimaqtyq jáne halyqaralyq kún tártibindegi kóptegen máseleler boiynsha, onyń ishinde Aýǵanstandaǵy ahýaldy turaqtandyrý máselesine qatysty kózqarastary men ustanymdary ortaq.
– Saýda-ekonomikalyq yntymaqtastyqty damytýda teńdessiz ilgerileý bar. Biylǵy 10 aidyń qorytyndysy boiynsha ekijaqty saýda ainalymy 30 paiyzǵa artyp, 3 milliard dollardan asty. Biz jýyq arada saýda ainalymynyń kólemin 5 milliard dollarǵa, al odan keiin 10 milliard dollarǵa deiin jetkizý mindetin qoidyq. Pikiralmasý nátijesinde bul qol jetkizýge bolatyn maqsat degen tujyrymǵa keldik. Árine, atqarýshy organdar, eń aldymen, úkimetterimiz osy maqsatqa jetý úshin tiisti jumystardy júrgizýge tiis, – dedi Qasym-Jomart Toqaev.
Taraptar gýmanitarlyq bailanystardyń jandanǵanyn oń baǵalady. Halyqtarymyzdyń ortaq rýhani-mádeni qundylyqtaryn baiyta túsken Qazaqstan men Ózbekstan jyldary eki jaqta da atap ótildi. Memleketaralyq qatynastardyń mártebesin odaqtastyq deńgeiine deiin kóterý jónindegi sheshim eki el basshylarynyń kelissózderi nátijesinde qol jetkizgen mańyzdy ýaǵdalastyqtardyń biri boldy.
– Búgin biz memleketaralyq qatynastardyń mártebesin odaqtastyq deńgeiine deiin kóterýge ýaǵdalastyq. Jańa ǵana osy másele boiynsha pikir almasyp, munyń elderimiz arasyndaǵy múldem jańa sapaly deńgei ekenin atap óttik. Árine, odaqtastyq qatynastar memleketterimizge erekshe mindet júkteidi. Men memleketaralyq keńes qurý jóninde usynys aittym. Osy keńes aiasynda biz qajetsiz resmilikten tys, iskerlik negizde jii bas qosa alamyz, – dedi Qazaqstan Prezidenti.
Óz kezeginde Shavkat Mirziioev shaǵyn quramda ótken kelissózdiń mazmundy bolǵanyn atap ótip, eki el arasyndaǵy saýda ainalymynyń rekordtyq deńgeige jetkenin jáne birlesken jobalardyń sátti júzege asyrylyp otyrǵanyn aitty.
– Biz kóp qyrly yntymaqtastyǵymyzdyń ózekti máseleleri boiynsha múddelerimiz ben ustanymdarymyzdyń ortaq ekenin taǵy da dáleldedik. Elderimiz arasynda ornatylǵan jaqyn ári baýyrlastyq bailanystarymyzdy joǵary baǵalaimyz. Jańa ǵana Qasym-Jomart Kemeluly halyqtarymyzdyń osy saparǵa rizashylyq tanytyp jatqanyn aitty. Shyn máninde, shekara mańyndaǵy eki eldiń de turǵyndary qatty qýanady. Sebebi biz jii kezdesken saiyn ózara qatynastarymyz jaqsara túsedi. Mashina jasaý, energetika, elektrotehnika, himiia, jeńil ónerkásip, bankter jáne basqa da salardaǵy kooperatsiia boiynsha sátti shyqqan jobalarymyz bar, – dedi Ózbekstan Prezidenti.
Qasym-Jomart Toqaev pen Shavkat Mirziioev kelissózder qorytyndysy boiynsha Qazaqstan Respýblikasy men Ózbekstan Respýblikasy arasyndaǵy odaqtastyq bailanystar týraly Deklaratsiiaǵa qol qoidy.
Budan bólek memleketter basshylarynyń qatysýymen resmi delegatsiialardyń músheleri tómendegi qujattarǵa qol qoidy:
Qazaqstan Respýblikasy men Ózbekstan Respýblikasy arasyndaǵy Bas bostandyǵynan aiyrýǵa sottalǵan adamdardyń jazacyn odan əri óteý úshin berý týraly shart;
Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy Tótenshe jaǵdailardyń aldyn alý jáne olardy joiý salasyndaǵy yntymaqtastyq boiynsha kelisim;
Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy Ǵarysh keńistigin beibit maqsattarda zertteý jáne paidalaný salasyndaǵy yntymaqtastyq týraly kelisim;
Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy qazaq-ózbek kedendik shekarasy arqyly qubyrjol kóligimen jáne elektr berý jelileri boiynsha energiia resýrstaryn ótkizý kezindegi birlesken kedendik baqylaý týraly kelisim;
Qazaqstan Respýblikasynyń Syrtqy ister ministrligi men Ózbekstan Respýblikasynyń Syrtqy ister ministrligi arasyndaǵy 2022-2023 jyldarǵa arnalǵan yntymaqtastyq baǵdarlamasy;
«Ortalyq Aziia» Halyqaralyq ónerkásip kooperatsiiasy ortalyǵyn qurý týraly tujyrymdama;
«Ortalyq Aziia» Halyqaralyq ónerkásip kooperatsiiasy ortalyǵyn qurý týraly birlesken jospar;
Túrkistan-Shymkent-Tashkent joǵary jyldamdyqtaǵy magistraldyq qurylys jobalaryn iske asyrý boiynsha birlesken is-qimyldar jospary;
Qazaqstan Respýblikasy Saýda jáne integratsiia ministrligi men Ózbekstan Respýblikasy Investitsiialar jáne syrtqy saýda ministrligi arasyndaǵy ózara túsinistik týraly memorandým;
2021-2025 jyldarǵa arnalǵan Qyzylorda-Úshqudyq avtokólik jáne temirjol joldarynyń qurylysy jobasyn iske asyrý jónindegi birlesken is-qimyldar jospary;
Qazaqstan Respýblikasy Energetika ministrligi men Ózbekstan Respýblikasy Energetika ministrligi arasyndaǵy energetika salasy boiynsha ózara yntymaqtastyq týraly memorandým;
Qazaqstan Respýblikasy Ádilet ministrligi men Ózbekstan Respýblikasy Ádilet ministrligi arasyndaǵy sot-saraptama qyzmeti salasy boiynsha yntymaqtastyq jónindegi ózara túsinistik týraly memorandým;
Qazaqstan Respýblikasy Eńbek jáne halyqty áleýmettik qorǵaý ministrligi men Ózbekstan Respýblikasy Jumyspen qamtý jáne eńbek qatynastary ministrligi arasyndaǵy áleýmettik-eńbek salasy boiynsha yntymaqtastyq niet týraly memorandým;
Ózbekstan Respýblikasyna tikelei jeke sheteldik investitsiialardy tartýdyń negizgi sharttary týraly kelisim;
Jobalardy birlesip iske asyrý máseleleri boiynsha yntymaqtastyqtyń negizgi sharttary týraly memorandým.
