Prezident Qasym-Jomart Toqaev elimizde kásipkerler quqyǵyn buzý derekteri áli baryn aitty, - dep habarlaidy Tengrinews.kz agenttigi.
"Ákimshilik kedergilerdi azaitý. Bul baǵytta jumystar júrgizilip jatyr. Sonymen qatar, kásipkerler quqyǵyn buzý derekteri áli de bar. Byltyr prokýratýra organdary kásipkerlerdiń laýazymdy tulǵalar is-áreketi men sheshimderimen kelispeitini týraly 2500-den asa shaǵymyn qarady. 1000-nan asa shaǵym qanaǵattandyryldy.
Kásipkerler politsiia qyzmetkerlerine, eń aldymen ekonomikalyq tergeý qyzmetterine, sybailas jemqorlyqqa qarsy qyzmetke, ulttyq qaýipsizdikke shaǵymdandy. Negizinen tintýge, sotaldy tergeýdiń negizsiz bastalýyna, múlikti paidalanýǵa shekteý qoiýǵa shaǵymdandy", - dedi Toqaev biznes ókilderimen kezdesýde.
Prezident Bas prokýratýraǵa osyndai zań buzýǵa yqpal etetin sebepter men jaǵdailardy anyqtap, zańbuzýshylyqqa jol bergen kináli adamdardyń is-áreketine túbegeili baǵa berýdi tapsyrdy.
"Quqyq qorǵaý organdaryn kommertsiialyq sýbektiler daýyn paidalaný jaǵdailaryn bolǵyzbaý jóninde sharalar qoldanǵan jón. Eger mundai jaǵdailar anyqtalsa, eń qatań sharalar qabyldaý qajet. Men birinshi Joldaýymda resmi organdar tarapynan zańdy kásipkerlikke kedergi jasaý memleketke qarsy qylmys retinde baǵalanýy tiis ekenin aitqanmyn", - dedi Prezident.
