Qazaqstan Respýblikasynyń Prezidenti – Qarýly Kúshterdiń Joǵarǵy Bas qolbasshysy Qasym-Jomart Toqaevtyń tóraǵalyǵymen Qorǵanys ministrliginde armiiany odan ári damytý máseleleri jóninde keńes ótti. Bul týraly Aqordanyń resmi saity habarlady.
Qasym-Jomart Toqaev qorǵanys vedomstvosynyń basshylyǵyna áskeri qaýipsizdiktiń qazirgi jaǵdaiyn eskere otyryp, Qarýly Kúshterdiń qurylymy men quramyn jańǵyrtý jóninde tapsyrma berdi. Sonymen qatar zamanaýi tsifrlyq tásilder arqyly áskeri basqarý júiesin jetildirý qajet ekenine nazar aýdardy.
Jiynda Qazaqstan áskerin zamanaýi ári joǵary tehnologiialy qarý túrlerimen, áskeri tehnikamen qaita jabdyqtaý máseleleri talqylandy. Qorǵanys ministrligine áskeri kúshterdi paidalanýdyń jańa ádisterin engizý arqyly jaýyngerlik daiyndyq baǵdarlamasyn qaita qaraý tapsyryldy.
Memleket basshysy áskeri qyzmetshilerdiń kásibi deńgeiin arttyrý, meritokratiia qaǵidaty negizinde mansapty ósirý maqsatymen áskeri bilim berý jáne kadrlyq saiasat júiesin damytý máselelerine basa mán berdi. Prezident áskeri qyzmetshiler men áskeri qyzmettiń áleýmettik mártebesin arttyrý jáne jastardy áskeri boryshyn óteýge yntalandyrý qajettigi týraly aitty.
Jiyn sońynda Joǵarǵy Bas qolbasshy memlekettiń múddesin jáne árbir azamattyń qaýipsizdigin qorǵaý Qarýly Kúshterdiń mindeti ekenin atap ótti.
