Qazaqstan Prezidenti Qasym-Jomart Toqaev "Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly" zańǵa qol qoidy, - dep habarlaidy "Ult aqparat" Aqorda saityna silteme jasap.
Burǵan deiin erekshe qajettilikteri bar balalardy oqytatyn bilim berý uiymdary baǵdarlamalaryn bilim alýshylar men tárbielenýshilerdiń jeke damý erekshelikteri men áleýetti múmkindikterine sáikes beiimdeýi tiis ekeni habarlanǵan. Mundai jańashyldyq Parlament depýtattary qabyldaǵan inkliýzivti bilim berý máseleleri jónindegi zańda jazylǵan.
Zań normalary arnaiy psihologiialyq-pedagogikalyq qoldaýǵa memlekettik bilim berý tapsyrysyn engizedi jáne bilim berý uiymdaryndaǵy psihologiialyq-pedagogikalyq qoldaý qyzmetteriniń jumysyn retteidi. Budan basqa, qujat bilim berý uiymdary basshylarynyń bilim berý mekemelerine múgedektigi bar balalardy qabyldaý qaǵidalaryn buzǵany nemese olar úshin jaǵdai jasamaǵany úshin jaýapkershiligin belgileidi.
Sondai-aq, zańda psihologiialyq-meditsinalyq-pedagogikalyq tekserý jáne konsýltatsiia baǵdarlamalaryn iske asyrý arqyly múmkindigi shekteýli balalardy bilim berý ortasyna qosý úshin ámbebap kózqaras qarastyrylǵan.
Barlyǵy tórt zańǵa: "Kemtar balalardy áleýmettik jáne meditsinalyq-pedagogikalyq túzeý arqyly qoldaý týraly"; "Bilim týraly"; "Bala quqyqtary týraly"; "Qazaqstan Respýblikasynda múgedekterdi áleýmettik qorǵaý týraly" zańǵa ózgerister men tolyqtyrýlar engizý kózdelgen.
