Qazaqstan Prezidenti Qasym-Jomart Toqaev Grýziianyń Premer-Ministri Mamýka Bahtadzeni qabyldady, dep habarlaidy "Ult aqparat" Aqordaǵa silteme jasap.
Memleket basshysy Mamýka Bahtadzeni aldaǵy Grýziianyń táýelsizdigi kúnimen quttyqtap, dostas grýzin halqyna jaqsylyq pen baq-bereke tiledi.
Qasym-Jomart Toqaev ekijaqty yntymaqtastyqtyń bastaýynda Tuńǵysh-Prezident – Elbasy Nursultan Nazarbaev turǵanyn atap ótip, diplomatiialyq qatynastardy ornatqannan bastap ony damytýǵa ózi tikelei atsalysqanyn aitty.
– Tuńǵysh Prezidentimiz – Elbasynyń Grýziiaǵa, sizderdiń basshylaryńyzdyń Qazaqstanǵa jasaǵan saparlary esimde. Eki el arasyndaǵy yntymaqtastyqtyń jaqsy damyp kele jatqanyn naqty aita alamyz, – dedi Qazaqstan Prezidenti.
Memleket basshysy Qazaqstannyń Grýziia ekonomikasyndaǵy negizgi investorlardyń biri ekenin atap ótti. Búginge deiingi salynǵan investitsiianyń jalpy kólemi 450 million dollardan asqan.
– Biz Grýziiany dostas memleket dep sanaimyz. Aramyzda eshqandai sheshilmegen másele joq. Bizdiń delegatsiialarymyz halyqaralyq uiymdarda ózara belsendi yntymaqtastyqta jumys isteidi. Qazaqstanda 60 myńǵa jýyq grýzin diasporasy bar. Olar elimizdiń tynys-tirshiligine óte belsendi ári konstrýktivti túrde atsalysady. Sizdiń bul saparyńyz memleketterimiz arasyndaǵy yntymaqtastyqtyń odan ári nyǵaiýyna tyń serpin beredi dep sanaimyn, – dedi Qasym-Jomart Toqaev.
Grýziia Úkimetiniń basshysy Qazaqstan tarapynyń dástúrli túrde jyly qabyldaǵanyn atap ótip, Grýziianyń egemendigi men aýmaqtyq tutastyǵyna qatysty turaqty ustanymy jáne halyqaralyq deńgeide qoldaý kórsetkeni úshin Prezidentke jáne Qazaqstan halqyna erekshe rizashylyq bildirdi.
– Maǵan Qazaqstanǵa jumys babymen birneshe ret kelýdiń sáti tústi. Halyqtarymyzdy kópǵasyrlyq dostyqtyń arqaýy bailanystyrady. Biz muny maqtan tutamyz. Qazaqstannyń Tuńǵysh Prezidenti Nursultan Ábishuly Nazarbaevtyń qarym-qatynastarymyzdy nyǵaitýǵa qosqan tarihi róli men ólsheýsiz úlesin atap ótkim keledi, – dedi M.Bahtadze.
Kezdesý barysynda saýda-ekonomikalyq, gýmanitarlyq, týrizm jáne investitsiia salalaryndaǵy yntymaqtastyqtyń perspektivalary qarastyryldy. Sondai-aq, taraptar kólik-tranzittik, sonyń ishinde Transkaspii halyqaralyq kólik baǵdary aiasynda Aqtaý jáne Quryq porttary arqyly qatynastardy jandandyrý múmkindikterin talqylady.
