Foto: Akorda.kz
Prezidenttiń Almaty qalasyna jumys sapary Footlab fýtbol ortalyǵynyń qyzmetimen tanysýdan bastaldy, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa jańa ortalyqtyń pilottyq rejimde jumys istei bastaǵany týraly málimet berildi. Munda qazir joǵary bilikti 8 bapker 50 balany jattyqtyryp jatyr. «Smart Football» jaýapkershiligi shekteýli seriktestiginiń quryltaishysy Murat Medeýovtiń aitýynsha, fýtbol akademiiasynda 5 jastan 12 jasqa deiingi 1000-ǵa jýyq balany jattyqtyrý josparlanǵan.
Footlab – sportsúier qaýymǵa, otbasylyq demalysqa, balalar men eresekter arasynda týrnirler ótkizýge arnalǵan interaktivti fýtbol alańy.
Almatydaǵy Footlab ortalyǵy Portýgaliianyń franshizasyn alǵan. Onyń bas keńsesi Lissabonda ornalasqan. Atalǵan jobany tanymal portýgal fýtbolshylary Rýi Koshta men Krishtianý Ronaldý 7EGEND innovatsiialyq kompaniiasymen birlesip jasaǵan. Búginde Footlab franshizasy álemniń 60-tan astam eline satylǵan. Bul ortalyq Lissabon men Dýbaidan keiin úshinshi bolyp, Almatyda ashyldy. Jobaǵa 1,5 milliard teńgeden astam jeke investitsiia salynǵan.
Ortalyqtyń biyl 50 myńnan astam adam qabyldaý, sondai-aq sport pen salaýatty ómir saltyn nasihattaý úshin Almaty qalasynyń oqýshylary arasynda týrnir ótkizý jospary bar. Investorlar elimizdiń barlyq óńirinde osyndai ortalyqtar jelisin ashýdy kózdep otyr.
Prezident balalarǵa arnalǵan sport jobasyn damytý úshin jaýapty organdarǵa jer telimin bólý máselesinde járdem kórsetýdi tapsyrdy jáne Astanada osyndai fýtbol ortalyǵyn salý týraly bastamany qoldady.
Qasym-Jomart Toqaev jas fýtbolshylarǵa tabys tilep, sport jeidesine qoltańbasyn qaldyrdy.
