Foto: Akorda.kz
Qasym-Jomart Toqaev Finliandiianyń Syrtqy saýda jáne halyqaralyq damýdy qoldaý ministri, Saýda-ekonomikalyq yntymaqtastyq jónindegi qazaq-fin úkimetaralyq komissiiasynyń teń tóraǵasy Ville Skinnaridi qabyldady, - dep habarlaidy "Ult aqparat" Aqorda saityna silteme jasap.
Memleket basshysy ministrge iltipat bildire otyryp, fin delegatsiiasynyń sapary ekijaqty yntymaqtastyqqa tyń serpin berý turǵysynan mańyzdy ekenin atap ótti.
Prezidenttiń aitýynsha, diplomatiialyq qarym-qatynas ornaǵan 30 jylda Finliandiia Soltústik Eýropa memleketteri arasynda ekonomikamyzǵa eń kóp investitsiia quiǵan ekinshi elge ainaldy. Sonymen qatar Finliandiianyń Ortalyq Aziia elderimen saýda ainalymynyń 90 paiyzy Qazaqstanǵa tiesili.
Qasym-Jomart Toqaev eki memlekettiń saýda-ekonomikalyq, kólik-logistika jáne bilim berý salalaryndaǵy seriktestigin nyǵaitý mańyzdy ekenin atap ótti. Memleket basshysy fin kásipkerleriniń Qazaqstanǵa quiatyn investitsiiasyn ulǵaita túsý úshin jan-jaqty qoldaý kórsetýge daiyn ekenin jetkizdi.
Óz kezeginde Ville Skinnari qurmetpen qabyldaǵany úshin Qasym-Jomart Toqaevqa alǵys aityp, eki el arasyndaǵy yntymaqtastyqty keńeitýge áleýet mol ekenin málimdedi.
Ministr Qazaqstanǵa saparmen kelgen delegatsiia quramynda Nurminen Logistics Plc, Nokia, EastCham Finland, Business Finland, Lamor, Wärtsilä Finland, PayIQ, EPSE sekildi 15 iri fin kompaniiasynyń ókilderi bar ekenin jetkizdi. Aldaǵy kezdesýler barysynda saýda-ekonomikalyq bailanystardy nyǵaitý máseleleri talqylanady.
Budan bólek, fin tarapy Astanadaǵy Finliandiia elshiligi janynan Ortalyq Aziia elderiniń azamattaryna qyzmet kórsetetin viza habyn ashady.
Áńgimelesý barysynda halyqaralyq jáne aimaqtyq kún tártibindegi ózekti máseleler de talqylandy.
Qasym-Jomart Toqaev Finliandiia Prezidenti Saýli Niinistioge izgi tilegin joldap, Qazaqstanǵa resmi saparmen kelýge shaqyrdy.
