Memleket basshysy Qasym-Jomart Toqaev Briýsselge resmi saparynyń sońynda Eýropalyq komissiianyń Prezidenti Ýrsýla fon der Liaienmen kezdesti, dep habarlaidy "Ult aqparat" Aqordaǵa silteme jasap.
Jyly shyraida ótken kezdesýde taraptar Qazaqstan men Eýropalyq Odaq arasyndaǵy saýda-ekonomikalyq jáne investitsiialyq bailanystardy jan-jaqty talqylady.
Sondai-aq pandemiiadan keiingi kezeńdegi ekonomikany qalpyna keltirý, klimattyń ózgerýi, kólik-logistika, gýmanitarlyq salalardaǵy yntymaqtastyqty damytý, ǵalamdyq jáne aimaqtyq qaýipsizdik máseleleri boiynsha pikir almasty.
Áńgime barysynda ekonomikalyq yntymaqtastyqty keńeitý máselesine basa mán berildi. Memleket basshysy Qazaqstan naryǵyna investitsiia salatyn eýropalyq investorlar úshin arnaiy jaǵdai jasalatynyn jáne institýttsionaldyq qoldaý kórsetiletinin atap ótti.
Eýropalyq Odaq – Ortalyq Aziiadaǵy Qazaqstannyń iri saýda jáne investitsiialyq áriptesi. Aimaqqa tartylǵan investitsiianyń 75 paiyzy bizdiń elimizge tiesili.
Kezdesýde taraptar «jasyl» ekonomika, ornyqty energetika jáne taý-ken ónerkásibi, agrobiznes, IT-tehnologiialar, innovatsiialar, tranzit jáne kólik, qarjy, densaýlyq saqtaý jáne farmatsevtika, bilim berý men týrizm siiaqty perspektivaly salalar boiynsha yqpaldastyqtyń jańa baǵyttaryn izdestirýge múddeli ekenderin bildirdi.
Eýropalyq Odaq Prezidenti Qazaqstanda júrgizilip jatqan saiasi jáne ekonomikalyq reformalarǵa joǵary baǵa berip, EýroOdaqtyń elimizben saýda-ekonomikalyq jáne investitsiialyq yqpaldastyqty odan ári nyǵaitýǵa beiildi ekenin naqtylady.
Ýrsýla fon der Liaien Qazaqstannyń Aýǵanstandaǵy ahýaldy turaqtandyrýǵa jáne gýmanitarlyq kómek berý sharalaryn qabyldap jatqanyna qoldaý bildirdi.
Kezdesý sońynda Qasym-Jomart Toqaev Ýrsýla fon der Liaiendi Qazaqstanǵa saparmen kelýge shaqyrdy.
