Foto: Aqorda
Prezident Qasym-Jomart Toqaevtyń tóraǵalyǵymen Qaýipsizdik Keńesiniń narkotizmge qarsy is-qimyl máseleleri jónindegi otyrysy ótti, dep habarlaidy Ult.kz.
Jiynda Ishki ister ministri Erjan Sádenovtiń, Ulttyq qaýipsizdik komitetiniń tóraǵasy Ermek Saǵymbaevtyń, Densaýlyq saqtaý ministri Aqmaral Álnazarovanyń jáne Qarjylyq monitoring agenttiginiń tóraǵasy Janat Elimanovtyń baiandamalary tyńdaldy.
Memleket basshysynyń aitýynsha, bul áleýmettik keseldiń beleń alýyna qatysty ahýal elimizde de, halyqaralyq aýqymda da alańdatarlyq jaǵdaiǵa jetti.
– Narkotizm – zamannyń derti, qoǵam úshin asa qaýipti. Ol jastardyń bolashaǵyna balta shabady. Ult saýlyǵyna qater tóndiredi. Nashaqorlyq pen esirtki biznesindegi álemdik úrdis alańdatarlyq sipatqa ie boldy. Kóptegen eldiń úkimetteri atalǵan problemany fizikalyq jáne psihikalyq táýeldilik qana emes, aýqymdy qoǵamdyq, ekonomikalyq jáne quqyqtyq qubylys retinde qarastyra bastady. Narkotizm termini mundai tásildiń mán-maǵynasyn ashady, – dedi Qasym-Jomart Toqaev.
Sarapshylar men ǵalymdar narkotizm uǵymynyń nashaqorlyqtan áldeqaida keń ekenin, áleýmettik, ekonomikalyq jáne quqyqtyq problemalarmen, sonyń ishinde ulttyq qaýipsizdik máselesimen ushtasyp jatqanyn aitady.
Prezident esirtkige táýeldiler emdeý-saýyqtyrý sharalarymen jetkilikti deńgeide qamtylmai otyrǵanyna nazar aýdaryp, máseleni sheshý qajet ekenin málimdedi.
– Esirtkige táýeldi jandardyń kópshiligi men olardyń jaqyndary jariialylyqtan jáne jurtshylyqtyń talqylaýynan qaýiptenip, problemasyn jasyrady, – dedi Memleket basshysy.
Bul rette memlekettik saiasattyń nashaqorlarǵa keńshilik tanytyp, al esirtki saýdasyna kelgende qatań jáne múlde tózbeýshilik ustanymda bolýǵa tiis ekeni aityldy.
Qasym-Jomart Toqaev atalǵan indetke qatysty statistikalyq málimetterdi jinaý men óńdeý baǵytyndaǵy aqparattyq-saraptamalyq jumysty jetildirý, sondai-aq himiialyq zattardyń taralýyn qadaǵalaý máselelerin taǵy bir mańyzdy mindet dep sanaidy.
Prezident nashaqorlyqtyń aldyn alý sharalaryn kúsheitýdi, ásirese, bilim berý men aqparat salasynda keńinen jumys júrgizýdi tapsyrdy.
Memleket basshysynyń pikirinshe, jastar arasynda esirtkiniń nasihattalýyna jol berýge bolmaidy. Bul rette ol internette jáne media indýstriiada tyiym salynǵan zattar men ishimdik ishýdi dáripteitin jaǵymsyz úrdis beleń alǵanyna toqtaldy.
Jiynda esirtkimen bailanysty quqyq buzýshylyqty anyqtaý, jolyn kesý men jazalaýdyń tiimdiligin arttyrýǵa qatysty keshendi máselelerge erekshe mán berildi.
– Kez kelgen esirtki túriniń óndirisi men satylymyna qatań tyiym salynyp, memlekettiń jiti baqylaýynda bolýy kerek, – dedi Prezident.
Qasym-Jomart Toqaev transulttyq uiymdasqan qylmysqa qarsy is-qimyldy, sondai-aq esirtki satatyn oryndar men zerthanalardyń ielerin áshkereleý jumystaryn kúsheitý qajettigin aitty.
Sonymen qatar Memleket basshysy kúmándi qarjy operatsiialaryn baqylaýǵa alýdyń mańyzyna toqtaldy. Bul túitkil quqyq qorǵaý organdarynyń nazarynan tys qalmaýǵa tiis.
Jiyn sońynda Prezident narkotizmge qarsy kúreske qoǵam bolyp jumylýdyń mańyzdy ekenin atap ótti. Sondai-aq Úkimetke, óńir ákimderine jáne jaýapty memlekettik organdarǵa nashaqorlyqtan saqtandyrý jáne esirtki biznesine qarsy kúres sharalaryn kúsheitý jóninde birqatar naqty tapsyrma berdi.
