Foto: Akorda.kz
Qasym-Jomart Toqaev Ankaraǵa jumys sapary barysynda Túrkiia Prezidenti Rejep Taiip Erdoǵanmen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysy qonaqjailyq kórsetip, qurmetpen qarsy alǵany úshin Rejep Taiip Erdoǵanǵa rizashylyǵyn bildirdi.
Qazaqstan Prezidenti eń aldymen joiqyn jer silkinisinen zardap shekken Túrkiia halqyna kóńil aitty.
– Marqumdardyń týǵan-týystaryna, Ózińizge jáne búkil Túrkiia halqyna taǵy da kóńil aitamyn. Túrkiia – árqashan qiyndyqqa qarsy tura bilgen memleket. Sizder mol tájiribe men el birliginiń arqasynda bul qiyndyqty eńserip shyǵasyzdar dep senemin, – dedi Qasym-Jomart Toqaev.
Prezident qaýip-qaterge qashan da daiyn bolý kerek ekenin atap ótip, tótenshe jaǵdailar salasyndaǵy yntymaqtastyqty damytýdyń mańyzdylyǵyna toqtaldy. Osy oraida «Apat jáne tótenshe jaǵdailar menedjmenti, gýmanitarlyq kómek» taqyrybynda ótip jatqan sammitti óte qajetti is-shara dep esepteitinin jetkizdi.
– Tabiǵi apat kezinde memleketterdiń bir-birine kómek kórsetýi asa mańyzdy. Buǵan osy joly taǵy da kózimiz jetti. Baýyrlas el qiyndyqqa tap bolǵanda túrki jurty aýyzbirshilik pen janashyrlyqtyń ozyq úlgisin kórsetti. Qazaqstan da túrik baýyrlarǵa birden qol ushyn sozdy, – dedi Memleket basshysy.
Sonymen qatar Prezident Túrkiia Qazaqstannyń basty saýda seriktesteriniń biri ekenin aitty.
– Túrkiia Qazaqstannyń basty bes saýda seriktesiniń qataryna kiredi. Byltyr eki el arasyndaǵy saýda ainalymy 33 paiyzǵa ósip, 6,3 milliard dollarǵa jetti. Bul – júieli jumystyń nátijesi. Qazaqstannyń taýarlaryn Túrkiia naryǵyna kóptep shyǵarýǵa múmkindik bar, - dedi Memleket basshysy.
Qasym-Jomart Toqaev túrik investorlarynyń Qazaqstandaǵy jobalaryn qoldaýǵa daiyn ekenin jetkizdi. Sondai-aq kezdesý barysynda «Orta dáliz» dep atalatyn Transkaspii halyqaralyq kólik baǵyty asa mańyzdy ról atqaratyny sóz boldy. Qazaqstan tarapy áleýeti mol osy kólik-logistikalyq baǵdardy damytý úshin ortaq infraqurylymdyq jobalardy júzege asyrýǵa daiyn ekenin málimdedi.
Óz kezeginde Rejep Taiip Erdoǵan shaqyrýyn qabyl alyp, Ankaraǵa kelgeni úshin Qasym-Jomart Toqaevqa alǵys aitty.
– Túrkiiaǵa kelgenińizge qýanyshtymyn. Alapat jer silkinisinen 49 myń adam qaza tapty. Osyndai qiyn sátte alǵashqy bolyp telefon shalǵan álemdik kóshbasshylardyń biri ózińiz boldyńyz. Qazaqstanyń qutqarýshylary zardap shekken azamattarymyzdy qutqarýǵa atsalysty. Biz shynaiy baýyrmaldyqty sezindik, – dedi Túrkiia Prezidenti.
Sondai-aq Rejep Taiip Erdoǵan keiingi jyldardaǵy ekijaqty saparlar nátijesinde barlyq salada ósim bar ekenin, jyl sońyna deiin taýar ainalymyn 10 milliard dollarǵa deiin jetkizý qajettigin aitty. Túrkiia basshysy kólik salasynda Orta dáliz áleýetin tolyq paidalaný kerektigin de atap ótti.
Sonymen qatar kezdesýde eki el arasyndaǵy saýda, ekonomika, investitsiia, kólik-logistika, energetika salalaryndaǵy yntymaqtastyqty nyǵaitýǵa basa mán berildi. Prezidentter halyqaralyq kún tártibindegi ózekti máseleler jóninde de pikir almasty.
