Prezident Qasym-Jomart Toqaev Mańǵystaý óńiriniń jurtshylyǵymen kezdesýinde Qazaqstandaǵy turaqtylyq pen qaýipsizdik týraly aitty, - dep habarlaidy "Ult aqparat" Aqordanyń baspasóz qyzmetine silteme jasap.
«Sońǵy birer aida elimizdiń memlekettik aqparattyq júielerine kibershabýyl jasala bastady. Mundai áreketter, ásirese, qazirgi naýqan kezinde kóp boldy. Biz buǵan jol bermeimiz, jalǵan aqparattyń taratylýyna tyiym salamyz.
Biz qasterli Táýelsizdigimizdi qorǵaý úshin bárine daiynbyz. Men buǵan deiin «Ulttyq múddeni aspen de, taspen de qorǵaimyz» degen edim. Bul qaǵidatymyz eshqashan ózgermeidi.
Eldegi turaqtylyq pen qaýipsizdikke ainalamyzdaǵy geosaiasi ahýaldan bólek, óz ishimizdegi ahýal da airyqsha áser etedi. Elge iritki salyp, alaýyzdyq týǵyzatyndar óz ishimizde de, syrtta da bar. Ár nársege nemquraily qarap, jaibaraqat júrýge bolmaidy» - dedi Memleket basshysy.
