Foto: tengrinews.kz
Májilis depýtaty Erlan Sairov Memleket basshysy Qasym-Jomart Toqaevtyń bilikke kelgen alty jylynda atqarǵan jumysyna qatysty pikir bildirdi, dep habarlaidy Ult.kz.
Depýtat E.Sairov Q.Toqaev el damýyna eleýli saiasi ózgerister ákelgenin atap aitty.
"Prezidenttiń ótken alty jyldaǵy qyzmetine kóz júgirtsek, eń aldymen memleket damýyna úles qosqan saiasi reformalaryn ataýǵa bolady. Q.Toqaev 2019 jyly bilikke kelgende-aq saiasi reformalarsyz eldiń áleýmettik-ekonomikalyq damýynyń beriktegin qamtamasyz etý múmkin emes ekenin málimdegen. Al sol saiasi ózgeristerdi júzege asyrý úshin Ulttyq qoǵamdyq senim keńesi quryldy. Bul keńes arqyly ózgeristerdiń belgili bir stsenarii jasaldy. Iaǵni Prezidenttiń keibir ókilettigin Parlamentke berý, bilik tarmaqtary arasyndaǵy balansty naqtylaý syndy birqatar ózgeris joldary naqtylandy", – deidi Májilis depýtaty.
Sondai-aq ol 2022 jylǵy konstitýtsiialyq reformalar elimizdiń saiasi baǵytyn túbegeili ózgertip, múldem basqa arnaǵa burǵanyn atap ótti.
Depýtat Sairov sonymen qatar shekaralyq aýdandardy damytý máselesi ózekti bolyp turǵan óte kúrdeli kezeńde ómir súrip jatqanymyzdy jetkizdi.
"Elimizdiń territoriialyq tutastyǵy – óte mańyzdy strategiialyq másele. Osy problemany sheshý úshin Prezident Q.Toqaev shekaralyq aýdandardy damytýǵa qatysty zańdy qarastyrý jóninde Úkimetke tapsyrma berdi. Buny negizinen «Amanat» partiiasynyń fraktsiiasy usynyp otyr. Osy másele sheshimin tabar bolsa, 65 shekaralyq aýdannyń áleýmettik-ekonomikalyq damýyna serpin bermek. Shekaralyq aýdandardyń eldi-mekenderi búginde internetke, telearnalarǵa, áleýmettik nysandarǵa qoly jetpei otyr. Osy olqylyqtyń bárin biz osy zańnyń aiasynda sheshýdiń keshendi sharalaryn qarastyrýymyz kerek", – dedi E.Sairov.
