Prezident Qasym-Jomart Toqaev ekonomikalyq máseleler jóninde keńes ótkizdi, - dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevtyń tóraǵalyǵymen ótken keńestiń kún tártibinde elimizdiń 2023-2027 jyldarǵa arnalǵan áleýmettik-ekonomikalyq damýynyń boljamy, sondai-aq 2023-2025 jyldarǵa arnalǵan respýblikalyq biýdjet jobasyna qatysty máseleler qaraldy.
Keńeske premer-ministr Álihan Smaiylov, Prezident Ákimshiliginiń basshysy Murat Nurtileý, Ulttyq bank tóraǵasy Ǵalymjan Pirmatov, premer-ministrdiń orynbasary – qarjy ministri Erulan Jamaýbaev, Prezident Ákimshiligi basshysynyń birinshi orynbasary Timýr Súleimenov, Esep komitetiniń tóraǵasy Natalia Godýnova jáne ulttyq ekonomika ministri Álibek Qýantyrov qatysty.
Premer-ministr usynǵan makroekonomikalyq kórsetkishter boiynsha 2022 jyly jalpy ishki ónimniń naqty ósimi 3 paiyzdan kem bolmaidy. Al 2023 jyly 4 paiyzǵa jetedi.
Prezident usynylǵan áleýmettik-ekonomikalyq damý boljamynyń tepe-teńdigin atap ótti. Úkimettiń derekterine sáikes, jalpy ishki ónimniń nominaldy ósimi biylǵy 103,6 trillion teńgeden 2023 jyly 120,7 trillion teńgege deiin jetedi dep boljanyp otyr. Boljam boiynsha kelesi jyly salyq túsimderiniń artýy esebinen biýdjettiń kiris bóligi 10,5 trillion teńgeden 13,5 trillion teńgege deiin ulǵaiady.
Respýblikalyq biýdjet jobasynyń oń aspektisi retinde Ulttyq qordan kepildendirilgen transfertterdiń 2022 jylǵy 4 trillion teńgeden 2023 jyly 2,2 trillion teńgege deiin kúrt tómendeýin aitýǵa bolady. Makroekonomikalyq turaqtylyqqa shikizattyq emes defitsittiń 2023 jyly 8,3 paiyzdan 6,8 paiyzǵa deiin tómendeýi de oń áser etedi.
Jiyn sońynda Qasym-Jomart Toqaev Úkimet nazaryn taǵy da qarjyny tiimdi josparlaý men úlestirý qajettiligine aýdardy. Jalpy alǵanda, Prezident Qazaqstan Respýblikasynyń 2023-2027 jyldarǵa arnalǵan áleýmettik-ekonomikalyq damýynyń usynylǵan boljamyn jáne 2023-2025 jyldarǵa arnalǵan respýblikalyq biýdjet jobasyn keńes barysynda talqylanǵan máselelerdi jetildirýdi eskerte otyryp, qoldady.
