Memleket basshysy Qasym-Jomart Toqaev ekologiia, geologiia jáne tabiǵi resýrstar ministri Serikqali Brekeshevti qabyldady, - dep habarlaidy "Ult aqparat" Aqorda saityna silteme jasap.
Prezidentke ministrliktiń biylǵy birinshi toqsanda atqarǵan qyzmetiniń negizgi qorytyndylary jáne aldaǵy kezeńge arnalǵan jospary jóninde esep berildi.
Atap aitqanda, ministr elimizdiń ekologiialyq ahýalyn jaqsartý úshin qabyldanyp jatqan sharalar týraly baiandady. Onyń aitýynsha, jańa Ekologiialyq kodekstiń normalaryna sáikes 83 iri kompaniiaǵa tehnologiialyq aýdit júrgizilgen. Bul olardyń 2025 jylǵa deiin jańa tehnologiiaǵa kóshýge daiyndyǵyn baǵalaýǵa múmkindik berdi.
Qasym-Jomart Toqaevqa "Jasyl Qazaqstan" ulttyq jobasy men ekologiialyq problemalardy sheshýge baǵyttalǵan óńirlik Jol kartalarynyń júzege asyrylý barysy tanystyryldy.
Sonymen qatar Memleket basshysyna geologiialyq salanyń jaǵdaiy men Ulttyq geologiialyq qyzmetti qurý jumystary týraly baiandaldy.
Budan bólek, Prezidentke sý sharýashylyǵy infraqurylymynyń ahýaly, vegetatsiialyq kezeńdi ótkizý, jańa Sý kodeksi, sondai-aq orman sharýashylyǵy men janýarlar áleminiń jai-kúii jóninde aqparat berildi.
Kezdesý sońynda Memleket basshysy ministrlikke ekologiialyq máselelerdi sheshý, sý sharýashylyǵy infraqurylymyn jaqsartý jáne geologiialyq salany damytý jóninde birqatar naqty mindet júktedi.
