Qazaqstan Prezidenti Qasym-Jomart Toqaev Eýraziialyq ekonomikalyq integratsiianyń 2025 jylǵa deiingi strategiialyq baǵyttaryn qosymsha talqylaý qajettigin aitty, dep habarlaidy QazAqparat.
«Joǵary Eýraziialyq ekonomikalyq keńeste Belarýstyń tóraǵalyǵy kúrdeli jaǵdaida ótip jatyr. Sáýir aiynda Aleksandr Lýkashenkonyń (Belarýs Prezidenti- avt.) bastamasymen biz Joǵary keńestiń jumys otyrysyn jańa formatta ótkizgen edik. Tsifrlandyrý damyp kele jatqan dáýirde jedel sheshim qabyldaýda jumystyń bul formaty edáýir mańyzdy ári tiimdi dep esepteimin. Shaǵyn quramdaǵy kún tártibiniń jobasyna bizdiń integratsiianyń bolashaǵy men Eýraziialyq ekonomikalyq integratsiianyń 2025 jylǵa deiingi strategiialyq baǵyttaryna qatysty mańyzdy máseleler enedi. Jalpy onyń qabyldanýyn qoldaimyn. Áitse de onda qosymsha talqylaýdy qajet etetin máseleler bar dep esepteimin», - dedi Qasym-Jomart Toqaev Joǵary Eýraziialyq ekonomikalyq keńestiń onlain rejimdegi otyrysynda.
Prezident óz sózinde integratsiianyń negizgi kontýrlaryn túzetetin atalǵan qujattyń mańyzyn eskere otyryp, qosymsha talqylaýdan ótkizip, qabyldaý kerektigin aityp ótti.
«Erte me, kesh pe – bir-birimizben kezdesemiz. Qazir qujatqa qatysty keibir pikirimdi bildirsem deimin. Birinshiden alǵa jyljýdyń berik irgetasyn qalaý kerek dep esepteimin. Taýarlardyń is júzinde, kedergisiz ári shekteýsiz qozǵalysyn qamtamasyz etý kerek. Sektordaǵy taraptardyń kelisýimen qyzmetterdiń biryńǵai naryǵyn quryp, ortaq energetikalyq jáne qarjylyq naryqqa daiyn bolǵan abzal. Sózsiz bizdiń memleketterimizdiń arasyndaǵy seriktes jan-jaqty sipatqa ie. Ol – ekonomikalyq, áleýmettik jáne gýmanitarlyq salanyń barlyq spektrin qamtidy. Bul máselelerdiń bárin Eýraziialyq ekonomikalyq komissiiany tarta otyryp, besjaqty formatta qarastyrý – onyń shynaiy júzege asýyn kúrdelendirýi múmkin. Densaýlyq saqtaý, bilim, ǵylym máselelerin Eýraziialyq ekonomikalyq komissiianyń quziretine engizý – onyń ekonomikalyq baǵyttaryn da ózgertip jiberýi múmkin. Basqasha aitqanda bul 2015 jyly qurylǵan Eýraziialyq ekonomikalyq odaqty qurý kelisiminiń mániniń ózine qaishy kelýi yqtimal. Sol sebepti bul baǵytta strategiialyq baǵyttardyń jobasynyń sheginde áreket etken, iaǵni ony ekonomika salasy retinde qarastyrǵan abzal», - dedi Memleket basshysy.
