Memleket basshysy DP World kompaniiasy direktorlar keńesiniń tóraǵasy Sultan Ahmed bin Sýlaiemdi qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa Qazaqstannyń kólik-logistikalyq áleýetin arttyrýǵa halyqaralyq kompaniianyń qatysýy jóninde málimet berildi.
Qazaqstan Prezidenti sheteldik investorlardyń ózara tiimdi jumysy úshin elimizde barlyq qajetti jaǵdai jasalǵanyn aitty.
– Qazaqstannyń Aqtaý, Quryq teńiz porttaryna qatysty infraqurylymdyq jobalardy júzege asyrýǵa atsalysyp júrgenińizdi bilemiz. Atalǵan jobalar jemisti ári tiimdi bolady dep úmittenemin, – dedi Memleket basshysy.
Sultan Ahmed bin Sýlaiem Qasym-Jomart Toqaevqa kezdeskeni úshin alǵys aityp, DP World kompaniiasynyń jaqyn arada iske asyrý úshin josparlaǵan perspektivti investitsiialyq jobalary týraly aitty.
