Foto: Aqorda
Astanada ótken Álemdik jáne dástúrli dinder kóshbasshylary sezinde Memleket basshysy Qasym-Jomart Toqaev órkenietter bailanysyn damytýda, sondai-aq adamdar men qoǵam arasyndaǵy senimdi nyǵaitýda dinbasylardyń róli erekshe ekenin atap ótti, dep habarlaidy Ult.kz.
Prezidenttiń aitýynsha, dini qairatkerler saiasatkerlerdi parasattylyqqa, izgilikke jáne moraldyq jaýapkershilikke úndep, álemniń qurdymǵa ketýine jol bermeýge zor úles qosa alady.
«Álemdik jáne dástúrli dinder kóshbasshylarynyń sezi, Adamzat baýyrlastyǵy týraly qujat, Mekke deklaratsiiasy, Bahrein forýmy, Birikken Arab Ámirlikterindegi «Ibrahim záýzatynyń úii» – osy bastamalardyń barlyǵy tize qosyp áreket etse, din uiystyrýshy kúshke ainalatynyn kórsetedi. Mundai tájiribeni odan ári damytyp, keńinen taratý qajet», – dedi Qasym-Jomart Toqaev.
Memleket basshysy Qazaqstannyń dinaralyq jáne mádenietaralyq dialogty nyǵaitýǵa qatysty ustanymymen de bólisti. Ol halyqaralyq jáne óńirlik uiymdar deńgeiinde dini diplomatiianyń áleýetin keńinen paidalanýdy usyndy. Prezidenttiń bastamasy boiynsha, «Beibitshilik qozǵalysy» ideiasy talqylanbaq. Onyń aiasynda joǵarǵy din qyzmetkerleri zorlyq-zombylyqty toqtatýǵa jáne bitimge kelý joldaryn izdeýge saiasi reńksiz, beitarap úndeý jasai alady.
Toqaev BUU-nyń Qazaqstan bastamalaryna qoldaý kórsetkenine rizashylyq bildirip, Almatyda Ortalyq Aziia men Aýǵanstanǵa arnalǵan Ornyqty damý maqsattary jónindegi óńirlik ortalyq ashý týraly usynysty atap ótti. Sondai-aq AÓSShK, IYU, EQYU, ShYU, ASEAN jáne Arab memleketteri ligasy sekildi óńirlik qurylymdardyń rólin kúsheitý mańyzdy ekenin aitty.
Prezidenttiń pikirinshe, dini konfessiialar qai zamanda da adamdarǵa qiyndyqtardy eńserýge kómektesip kelgen.
«Adamzat búginde ashtyq, indet, ekologiialyq apat jáne klimat ózgerisi sekildi syn-qaterlerge tap bolyp otyr. Qazaqstan kedeilikti azaitýǵa, ekologiialyq problemalardy sheshýge jáne gýmanitarlyq kómek kórsetýge aitarlyqtai kúsh jumsap keledi. Bul máselelerdi kelesi jyly Astanada ótetin Ekologiia jáne ornyqty damý óńirlik sammitinde talqylaýdy josparlap otyrmyz», – dedi ol.
Memleket basshysy din qairatkerleriniń gýmanitarlyq missiialarǵa atsalysyp, eriktiler qozǵalysyn qoldaitynyn, áleýmettik álsiz toptarǵa qamqorlyq jasap, klimat pen migratsiia máselelerin kóteretinin atap ótti.
«Bul – XXI ǵasyrda da dinniń jasampaz kúshke ie ekenin dáleldeidi. Onyń múmkindigin tolyq paidalaný qajet», – dedi Qasym-Jomart Toqaev.
Prezident álemniń kúrdeli ekologiialyq qaýip-qatermen betpe-bet kelgenin, ásirese Ortalyq Aziia aimaǵynyń klimat ózgerisin aiqyn sezinip otyrǵanyn jetkizdi. Ol qurǵaqshylyq pen muzdyqtardyń erýi, tushy sýdyń azaiýy óńir úshin úlken syn ekenin aitty.
«Jer – Jaratýshy syilaǵan ortaq úiimiz. Oǵan qamqorlyq tanytý – paryzymyz. Klimattaǵy ózgerister – tek ǵylymi nemese ekonomikalyq másele emes, adamgershilik qundylyqtar úshin synaq. Sondyqtan Sezd aiasynda klimat ózgeristerine qarsy kúrestegi din kóshbasshylarynyń róli týraly birlesken qujat ázirleýdi usynamyn. Bul qujat rýhani dástúrlerge negizdelgen ekologiialyq jaýapkershiliktiń jalpyǵa ortaq qaǵidattaryn bekite alady», – dedi Qasym-Jomart Toqaev.
