Memleket basshysy Qasym-Jomart Toqaev BUU Bas hatshysy Antoniý Gýterrishpen telefon arqyly sóilesti, dep habarlaidy Aqorda.
Áńgime barysynda COVID-19 pandemiiasyn jáne onyń saldaryn joiý aiasynda BUU men Qazaqstannyń qabyldaǵan naqty is-sharalary talqylandy.
Qazaqstan Prezidenti pandemiianyń ulttyq ekonomika men densaýlyq saqtaý júiesine tigizgen keri áserin jeńildetýge qatysty BUU Bas hatshysynyń belsendi áreketterine joǵary baǵa berdi. Qasym-Jomart Toqaev qazirgi jaǵdaidyń jahandyq daǵdarysqa qarsy kúreste aldyńǵy shepte júrgen BUU men onyń agenttikteriniń mańyzdy ról atqaratynyn aiqyndap bergenin atap ótti. Qazaqstan halyqaralyq qaýipsizdikti nyǵaitýǵa jáne ekonomikany qaita qalpyna keltirýge baǵyttalǵan BUU bastamalaryn tolyqtai qoldaidy.
Antoniý Gýterrish Qasym-Jomart Toqaevqa BUU-nyń bastamalaryn qoldaǵany jáne óńirlik deńgeidegi koronavirýsqa qarsy kúreske qosqan eleýli úlesi úshin rizashylyǵyn bildirdi. Bas hatshy azamattardyń densaýlyǵyn saqtaý, halyqtyń jaǵdaiy tómen toptaryna qarjylai kómek kórsetý, biznesti qoldaý jáne daǵdarystan keiingi kezeńdegi jańa ekonomikalyq baǵytty aiqyndaý maqsatynda Qazaqstannyń qabyldaǵan sharalaryn quptady. Sonymen qatar Antoniý Gýterrish Qazaqstannyń teńizge shyǵatyn joly joq damýshy elder tobyna tóraǵalyq etýine (2020-2021 j.j) oń baǵa berip, Qasym-Jomart Toqaevty «COVID-19 tusynda jáne odan keiingi kezeńde damýdy qarjylandyrýdyń joǵary deńgeidegi segmenti» atty forýmǵa qatysýǵa shaqyrdy.
Atalǵan shara 28 mamyr kúni beine konferentsiia formatynda ótedi. Oǵan birqatar eldiń basshylary men kóptegen institýttardyń jetekshileri qatysady. Koronavirýs epidemiiasy jalǵasqan jaǵdaida artta qalǵan jáne damýshy memleketterge qoldaý kórsetý máselesin talqylaý jiynnyń basty taqyryby bolmaq.
Memleket basshysy aldaǵy onlain forýmǵa qatysýǵa kelisim berdi. Sondai-aq álemdik qoǵamdastyqtyń tilektestik rýhy men birlesken is-qimyldary adamzattyń pandemiianyń keshendi qaýpin eńserip, BUU-nyń 2030 jylǵa deiingi ornyqty damý maqsattaryn júzege asyrýǵa múmkindik beretinine senim bildirdi.
Telefon arqyly sóilesýge BUU Bas hatshysy bastamashy boldy.
***
Teńizge shyǵatyn joly joq damýshy elder tobyna 32 memleket (Afrikanyń 16, Aziianyń 10, onyń ishinde Ortalyq Aziianyń 5 memleketi men Aýǵanstan, Eýropanyń 4, Ońtústik Amerikanyń 2 eli) kiredi. Qazaqstan óziniń tóraǵalyǵy aiasynda «Teńizge shyǵatyn joly joq damýshy elderdiń 2014-2024 jyldarǵa arnalǵan is-qimyldarynyń Vena baǵdarlamasyn» júzege asyrýdy maqsat etedi.
