Prezident Qasym-Jomart Toqaevtyń Qazaqstan halqyna úndeýiniń tolyq mátini jariialandy, - dep habarlaidy "Ult aqparat" Aqordanyń baspasóz qyzmetine silteme jasap.
***
Qurmetti otandastar!
Qazaqstan óte mańyzdy ári betburysty kezeńge qadam basqaly tur. 5 maýsym kúni azamattarymyz jalpyulttyq referendýmda daýys beredi. Konstitýtsiiaǵa túzetýler engizý máselesi boiynsha sheshim qabyldaidy. Bul – memlekettiń jáne búkil qoǵamnyń bolashaǵyn aiqyndaityn jaýapty sát. El taǵdyry eshkimdi bei-jai qaldyrmaityny anyq.
Biz qazir barlyq salany jańǵyrtýǵa kiristik. Osy jolda memleketti basqarý úlgisin túbegeili ózgertý qajettigi týyndady. Sol sebepti men naýryz aiyndaǵy Joldaýymda saiasi jańǵyrýdyń aýqymdy baǵdarlamasyn usyndym. Onyń basty maqsaty – elimizdi odan ári demokratiialandyrý, halyqtyń memleketti basqarý isine qatysý múmkindigin keńeitý. Sondai-aq Úkimettiń tiimdiligin arttyrý. Bul ózgeristi tolyq júzege asyrsaq, yqpaldy parlamenti bar prezidenttik respýblika úlgisine birjola kóshemiz.
Konstitýtsiialyq reforma adam quqyqtary men bostandyqtaryn qorǵaý júiesin barynsha kúsheitedi. Sonymen birge elimizdegi saiasi básekeniń ádil jáne ashyq bolýyn qamtamasyz etedi.
Biz Ata zańymyzdyń otyzdan astam babyna ózgeris engizgeli otyrmyz. Onyń bári azamattarymyzdyń múddesine tolyq sai keledi. Osylaisha memleketimizdi túbegeili jańǵyrtamyz. Sol arqyly Ekinshi Respýblikanyń negizin qalaimyz.
Qurmetti otandastar!
Elimizdiń tarihynda Konstitýtsiiaǵa engiziletin ózgerister alǵash ret jalpyhalyqtyq referendým arqyly júzege asyrylady.
Referendým ótkizý – Qazaqstanda damyǵan demokratiialyq qoǵam qurý jolyndaǵy mańyzdy qadam.
Ata zańǵa engiziletin túzetýler jobasy elimizde bir ai boiy qyzý talqylandy. Túsindirý jumystary júrgizildi. Qoǵamda konstitýtsiialyq reformaǵa qatysty pikirler kóp aitylyp jatyr. Onyń erejeleri Prezidenttiń artyqshylyqtary men ókilettigin kúsheitýge emes, bilik tarmaqtary arasyndaǵy úilesimdi jáne tepe-teńdik júieni nyǵaitýǵa, barlyq azamattyń múddesin, quqyǵy men erkindigin qorǵaýǵa baǵyttalǵan.
Búkil halyqtyń Konstitýtsiiaǵa engiziletin ózgeristerge qatysty erikti tańdaýy Jańa, Ádiletti Qazaqstannyń berik irgetasyn qalaidy. Biz birlese otyryp, shyn máninde, Jańa Qazaqstan quramyz. Onda áleýmettik ádildik jańa qoǵamdyq kelisimniń basty qundylyǵy jáne negizgi ózegi bolady.
Referendým qoǵamymyzdyń azamattyq kemeldigi men saiasi sanalylyǵyn baǵalaýǵa múmkindik beredi. Referendýmnyń ortalyq komissiiasy men basqa da ýákiletti memlekettik organdar sailaý zańnamasyndaǵy barlyq normanyń múltiksiz saqtalýyn qamtamasyz etedi. Daýys berý barysyn halyqaralyq baqylaýshylar men elimizdegi qoǵamdyq birlestikterdiń ókilderi qadaǵalaidy.
Sailaý ýchaskesindegi sizdiń daýysyńyz qoǵamdyq ómirdiń ádil ári túsinikti jańa erejelerin aiqyndaýda mańyzdy jáne sheshýshi ról atqarýy múmkin. Siz sailaý ýchaskesine kelý arqyly halqymyzdyń birligi men yntymaǵy myǵym ekenin kórsetesiz.
Buryn-sońdy bolmaǵan qubylmaly geostrategiialyq jaǵdaida jáne elimizdiń aldynda turǵan kúrdeli mindetterdi oryndaý úshin bizdiń birligimiz bekem, yntymaǵymyz berik bolýǵa tiis. Shynaiy demokratiia árbir azamattyń ortaq iske belsendi ári sanaly túrde qatysýyn bildiredi. Siz jańa túzetýlerge daýys bere otyryp, jemqorlyqqa, tamyr-tanystyqqa, saiasat pen ekonomikadaǵy monopoliiaǵa batyl qarsy shyǵasyz.
Qurmetti otandastar, sizderdi tarihi tańdaý jasaýǵa shaqyramyn. Óitkeni, bul Qazaqstannyń damý baǵdaryn aiqyndaidy. Árqaisyńyz birtutas Qazaqstan halqynyń ajyramas bólshegisiz jáne tutas ulttyń bolashaǵyna yqpal ete alasyz. Demek, bul – óz taǵdyryńyz degen sóz. Otanymyzdyń taǵdyry sizderge bailanysty.
Aldaǵy referendým memleketimizdi nyǵaitýǵa jáne qoǵamdy tyń serpinmen damytýǵa jol ashady. Men árbir azamatymyzdy el taǵdyryn aiqyndaityn tarihi tańdaý jasaýǵa shaqyramyn. Bul referendýmda ár azamattyń daýysy – mańyzdy. Árbir azamat tutas ulttyń taǵdyryna, iaǵni tikelei óz taǵdyryna oń yqpal ete alady.
Endeshe, 5 maýsym kúni óz tańdaýymyzdy jasaiyq!
Jańa Qazaqstandy bárimiz birge quraiyq!
