Memleket basshysy Qasym-Jomart Toqaev Bolgariianyń Vitse-prezidenti Iliiana Iotovany qabyldady, dep habarlaidy "Ult aqparat" Aqordaǵa silteme jasap.
Kezdesý barysynda taraptar eki jaqty yntymaqtastyqtyń qazirgi jai-kúii men perspektivalaryn, onyń ishinde Bolgariia Prezidenti Rýmen Radevtyń Nur-Sultanǵa keler jylǵy saparyn talqylady.
Qasym-Jomart Toqaev Qazaqstan men Bolgariia arasyndaǵy jan-jaqty qarym-qatynasty odan ári keńeite berýge nietti ekenin bildirdi.
Prezidenttiń aitýynsha, Qazaqstan Bolgariiaǵa saýda-ekonomikalyq áriptestik turǵysynan da, Eýropa Odaǵymen ózara is-qimyl baǵyty boiynsha da qyzyǵýshylyq tanytady. Eki el arasyndaǵy qarym-qatynastardyń damýyna halqymyzdyń ajyramas bóligine ainalǵan bolgar diasporasynyń qosatyn úlesi zor.
– Qazaqstannyń jerinde bolgar halqynyń besinshi býyny ómir súrip jatyr. Biz bolgar halqyna úlken qurmetpen qaraimyz, Bolgariiamen aradaǵy yntymaqtastyǵymyzdy joǵary baǵalaimyz, eki el arasyndaǵy qarym-qatynas tabysty damýda,– dedi Memleket basshysy.
Qazaqstan kóshbasshysy qazirgi ýaqytta Bolgariiamen ózara is-qimyldardy jańa sapaly deńgeige kóterýge qolaily jaǵdai qalyptasqanyn atap ótti. Óz sózinde Qasym-Jomart Toqaev ekijaqty qarym-qatynastarǵa tyń serpin beretin perspektivaly baǵyttardy ázirleý úshin Úkimetaralyq komissiianyń jumysyn jandandyrý mańyzdy ekenin aitty.
Óz kezeginde Bolgariianyń Vitse-prezidenti memleketter arasyndaǵy, onyń ishinde Eýropalyq Odaq boiynsha da yntymaqtastyqty odan ári damytýǵa beiildi ekenin bildirdi.
Iliiana Iotovanyń sózinshe, búginde Qazaqstan Qasym-Jomart Toqaevtyń 2019 jyldyń qyrkúiegindegi Joldaýynda aitylǵan aýqymdy reformalardy júzege asyrý jaǵynan úlken jetistikterge qol jetkizdi. Onyń oiynsha, atalǵan baǵdarlamany iske asyrý halyqtyń ál-aýqatyn artyrýǵa, Úkimet pen azamattyq qoǵam arasyndaǵy dialogty qalyptastyrýǵa zor yqpal etedi. Bolgarlyq saiasatker Memleket basshysynyń Ulttyq qoǵamdyq senim keńesin qurý týraly ideiasyna qyzyǵýshylyq tanytty.
Sonymen qatar Iliana Iotova etnosaralyq kelisimniń qazaqstandyq modelin joǵary baǵalap, bolgar diasporasy Qazaqstannyń damýyna eleýli úles qosa beretinine senim bildirdi.
Kezdesý sońynda Bolgariianyń Vitse-prezidenti Pavlodar oblysyna baryp, onda jergilikti bolgar etnosy ókilderimen kezdesýdi josparlap otyrǵanyn aitty.
