Qasym-Jomart Toqaev «Bolashaqtyń oiyndary» halyqaralyq týrniriniń ashylý rásimine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Prezident resmi minberden «Bolashaqtyń oiyndary» týrniriniń saltanatty ashylý rásimin tamashalady.
Reseidiń memlekettik ánurany oryndalǵannan keiin Vladimir Pýtin jarysty ashyq dep jariialady.
Qazaqstan Prezidenti týrnir qatysýshylaryna sáttilik tiledi.
"Qurmetti Vladimir Vladimirovich, eń aldymen, Sizge zor rizashylyq bildirgim keledi. Bul – biregei oiyn. Dúniejúzinde mundai oiynnyń balamasy joq. Barshańyzǵa sáttilik tileimin. Kelesi oiyndy Qazaqstanda ótkizeiik", – dedi Qasym-Jomart Toqaev.
Sonymen qatar Belarýs, Qyrǵyzstan, Tájikstan jáne Ózbekstan prezidentteri kibersportshylarǵa izgi tilekterin joldady.
Sodan soń jarysqa qatysýshy memleketter týlarynyń sherýi ótti.
«Fidjital-kontseptsiiaǵa» negizdelgen týrnirdiń formaty fizikalyq belsendilikti, zamanaýi tehnologiia men tsifrlyq ortany ushtastyrady.
Shoý barysynda sport, strategiia, taktika, tehnologiia, jyldamdyq sekildi 5 topqa biriktirilgen saiys túrleri tanystyryldy.
Oiyndardyń baǵdarlamasyna klassikalyq sport túrleri men olardyń 21 tsifrlyq balamalary boiynsha gibridti sporttyq jarystar engizilgen.
Uiymdastyrýshylardyń málimeti boiynsha týrnirge 100-den astam elden 2 myńǵa jýyq kibersportshy kelgen.
Qazaqstannyń oiynshylary men komandalary sporttyń 13 túri boiynsha saiysqa túsedi. Jalpy bul týrnirge elimizdiń 48 ókili qatysady.
