QR Prezidenti Qasym-Jomart Toqaev búgin QR Parlamenti Senatynyń otyrysyna qatysty. "Ult aqparat" Memleket basshysynyń otyrysta sóilegen sóziniń tolyq mátinin jariialaidy.
***
Qurmetti Senat depýtattary!
Biz búgin erekshe jaǵdaida kezdesip otyrmyz.
Qazir búkil álem jurtshylyǵy kúrdeli daǵdarysqa ushyrady.
Muny jaqsy bilesizder.
Koronavirýs derti Qazaqstandy da ainalyp ótken joq.
Soǵan bailanysty halqymyz on altynshy naýryzdan bastap tótenshe jaǵdaida ómir súrýde.
Karantin rejimi azamattarymyzǵa aitarlyqtai qiynshylyq týǵyzdy.
Degenmen, búkil elimiz osy indetke qarsy kúresý úshin judyryqtai jumyla bildi.
Ásirese, dárigerler, áskeri qyzmetshiler, politseiler, volonterler kún-tún demei jumys isteýde.
Olardyń bári Otanǵa adal qyzmet etýdiń ozyq úlgisin kórsetti.
Syn saǵaty qasietti Ramazan aiymen tuspa-tus keldi.
Halyqtyń jigerin qairap, tózimin shyńdaýǵa munyń da áseri boldy.
Biz der kezinde qolǵa alynǵan sharalardyń arqasynda indettiń jappai taralýyna tosqaýyl qoidyq.
Muny Dúniejúzilik densaýlyq saqtaý uiymy, halyqaralyq sarapshylar joǵary baǵalady.
Pandemiia el ekonomikasyna keri áserin tigizip otyr.
Osyǵan orai, Úkimet azamattarǵa, shaǵyn jáne orta biznes ókilderine qoldaý kórsetýde.
Biýdjetten qomaqty qarajat bólindi.
Tabysynan aiyrylǵan adamdar qarjylai kómek alyp jatyr.
Munyń bári halyqtyń turmys jaǵdaiyn tómendetpeý úshin jasalýda.
Qabyldanǵan sharalar óz nátijesin bere bastaǵanyn kórip otyrmyz.
Jaǵdai kúrdelenip ketpese, tótenshe jaǵdai rejimi on birinshi mamyrda aiaqtalady.
Biraq karantin rejimine bailanysty is-sharalar jalǵasa beredi.
Bul el turǵyndarynyń qaýipsizdigi úshin asa qajet.
Azamattarymyz birte-birte qalypty ómirge qaita oralady dep senemin.
Qurmetti depýtattar!
Bizdiń uzaq merzimdi strategiialyq damý jolymyz bar.
Qandai qiyndyq bolsa da, Elbasymyzdyń strategiiasyn júzege asyramyz.
Bul – saiasi sabaqtastyqty saqtaý degen sóz.
Táýelsiz Qazaqstannyń Tuńǵysh Prezidenti – memleketimizdiń negizin qalaýshy, álemdik deńgeidegi tarihi tulǵa.
Muny eshqashan umytpaýymyz qajet.
Sondai-aq, óskeleń urpaqqa túsindirgenimiz jón.
Biz daǵdarystan keiingi kezeńge qazirden bastap daiyndalýymyz kerek.
Qandai kúrdeli jáne qaýipti bolsa da, daǵdarys – ótpeli nárse. Ol jańa múmkindikterge jol ashady.
Sondyqtan Elbasy jiyrma tórtinshi sáýirde Qaýipsizdik keńesiniń otyrysynda keleshektegi ekonomikalyq strategiiamyz jóninde aityp, aiqyn baǵdar kórsetti.
Men jiyrma jetinshi sáýirde arnaiy málimdeme jasadym.
Úkimet pen ákimderdiń aldyna naqty mindetter qoidym.
Osyǵan orai keshendi is-qimyl baǵdarlamasy bar dep kúmánsiz aitýǵa bolady. Ony eshqandai qosymsha málimdemelermen tolyqtyrmai júzege asyrǵan jón.
Qazir Úkimet pen Ulttyq bank Ekonomikalyq damýdy qalpyna keltirý úshin jumys júrgizýde.
On birinshi mamyrǵa deiin arnaiy jospar daiyndalmaqshy.
Ekonomikada túbegeili reforma júrgizýimiz kerek. Bul – asa kúrdeli mindet.
Eń aldymen, ekonomikalyq ósimdi qalpyna keltirip, halyqtyń ál-aýqatyn arttyrý qajet.
Biz osy pandemiiadan sabaq alýymyz kerek.
Keibir salalarda kemshin tustarymyz bar.
Muny indetten týyndaǵan ahýal anyq ańǵartty.
Sondyqtan, alda turǵan birqatar mindetterge nazar aýdarǵym keledi.
Birinshi kezekte densaýlyq saqtaý júiesine basa mán bergen jón.
Bul salany jańǵyrtý úshin tyń bastamalardy qolǵa alýymyz qajet.
Zaman talabyna sai aýrýhanalar salyp, qajetti qural-jabdyqpen qamtamasyz etý asa mańyzdy.
Budan bylai meditsina ǵylymyn damytýǵa erekshe kóńil bólýimiz kerek.
Osy salada eńbek etip júrgen ǵalymdarymyzdyń áleýeti zor.
Mamandarǵa laiyqty jaǵdai jasap, naqty qoldaý kórsetken abzal.
Sonymen qatar bilim jáne ǵylym salasyn tolyǵymen jańǵyrtatyn bolamyz.
Osy rette ozyq tehnologiialar men tsifrlandyrýdy keńinen qoldanýymyz kerek. Bul – basty mindetterdiń biri.
Biz básekege qabiletti ult qalyptastyrý úshin adami kapitaldy damytýymyz kerek.
Bul – strategiialyq mańyzy bar mindet.
Óitkeni Qazaqstannyń bolashaǵy bilimdi ári bilikti azamattardyń qolynda.
Memleket tótenshe jaǵdai kezeńinde muqtaj jandardy erekshe qamqorlyqqa aldy.
Mundai is-sharalar, tipti, damyǵan memleketterde de bolǵan joq.
Taǵy bir mańyzdy maqsat – shaǵyn jáne orta biznesti órkendetý.
Oǵan memleket tarapynan barynsha qoldaý kórsetý kerek.
Ulttyq ekonomikany ártaraptandyrý – kezek kúttirmeitin mindet.
Shikizatqa táýeldilikten arylý úshin otandyq óndiristiń jumysyn jandandyrý qajet.
Bul – ońai másele emes. Degenmen, ony basty nazarda ustaimyz.
Biz qolǵa alǵan saiasi reformalardy jalǵastyra beremiz.
Onsyz memleketimiz damymaidy.
Osy rette memlekettik basqarý júiesiniń tiimdiligin arttyrý asa mańyzdy.
Bizge basshylardyń jańa býynyn tárbieleý kerek.
Eldiń múddesin oilaityn mamandar bolmasa, bastamalarymyz nátijesin bermeidi.
Osy turǵyda men usynǵan «Halyq únine qulaq asatyn memleket» tujyrymdamasynyń mańyzy zor dep oilamyn.
Jalpy, biz Elbasy maquldaǵan Ult josparyn mindetti túrde júzege asyrýymyz kerek.
Bul – búgingi zamannyń talaby.
Mine, búkil elimizdiń aldynda turǵan osyndai mindetterdi oryndaý úshin eń aldymen bilik tarmaqtary arasyndaǵy úilesim qajet.
Mańyzdy reformalardy júzege asyrýda Parlamenttiń, ásirese, Senattyń róli de, quzyreti de erekshe.
Senattyń eń basty mindeti – sapaly zańdardy qabyldaý.
Mundai zańdar reformalarǵa jol ashady, turaqtylyq pen tártipti qamtamasyz etedi.
Senat depýtattary zań jobalaryn talqylaý kezinde nemese basqa formattaǵy basqosýlar barysynda qoǵamymyzdaǵy eń ózekti, eldi alańdatatyn máseleler jóninde ótkir oilar, syni pikirler aitýǵa quqyly. Bul másele boiynsha daý joq.
Bul rette, sizderdiń jumystaryńyz óte jaýapty ekenin jaqsy bilemin.
Ózderińizge málim, meniń jarlyǵymmen Senat depýtaty Dariǵa Nursultanqyzy Nazarbaevanyń ókilettigi toqtatyldy.
Ol Senat Tóraǵasy retinde bir jyldan astam belsendi ári jemisti jumys istedi.
Sol úshin Dariǵa Nursultanqyzyna rizashylyǵymdy bildirdim.
Qurmetti Senat depýtattary!
Meniń Jarlyǵymmen Máýlen Saǵathanuly Áshimbaev Senat depýtaty bolyp taǵaiyndaldy.
Konstitýtsiianyń 58-shi babynyń 1-shi tarmaǵyna sáikes Parlament Senatynyń Tóraǵasy laýazymyna Máýlen Saǵathanuly Áshimbaevtyń kandidatýrasyn usynamyn.
Ol memleket qyzmetiniń qyr-syryn jetik meńgergen, uzaq jyl túrli salada jemisti jáne tiimdi jumys atqardy.
Parlament jumysyn jaqsy biledi.
Árdaiym ózine júktelgen mindetterdi abyroimen atqaryp keledi.
Memlekettik qyzmettegi tájiribesi mol. Sondyqtan bul qyzmetti abyroimen atqaratynyna kúmánim joq.
Máýlen Saǵathanuly Áshimbaevtyń kandidatýrasyn Senat Tóraǵalyǵyna laiyqty dep sanaimyn.
Qurmetti depýtattar!
Barshamyz kúrdeli kezeńnen elimizdi aman-esen alyp shyǵý úshin jumyla jumys isteýimiz kerek.
Árdaiym baǵyt-baǵdarymyzdan jańylmai, alǵa batyl qadam jasaiyq.
Jalpy, Senat depýtattarynyń jumysyna rizamyn.
Birligimiz bekem bolsa, kez kelgen qiyndyqty eńseremiz.
Barshańyzǵa zor densaýlyq, baq-bereke, jumystaryńyzǵa jemis tileimin
Rahmet!
