Aqorda rezidentsiiasynda úsh memlekettiń qaita taǵaiyndalǵan tótenshe jáne ókiletti elshileriniń Qazaqstan Prezidentine senim gramotalaryn tapsyrý rásimi ótti.
Bul týraly "Ult aqparat" Aqordanyń resmi saityna silteme jasap habarlaidy.
Senim gramotalaryn Latviia Respýblikasynyń elshisi Irina Mangýle, Túrikmenstan elshisi Batyr Redjepov jáne Tailand Koroldiginiń elshisi Chatchavan Sakornsin tabystady.
Qasym-Jomart Toqaev elshilerdi Qazaqstandaǵy diplomatiialyq missiianyń resmi túrde bastalýymen quttyqtap, olardyń mol tájiribesi men kásibi biliktiligi dostas halyqtardyń ártúrli salalar boiynsha jaqyndasa túsýine yqpal etedi dep senetinin jetkizdi. Memleket basshysy Prezident Ákimshiligi men Úkimet tarapynan elshilerdiń igilikti missiiasyn oryndaýǵa tolyq qoldaý ári kómek kórsetiletinin aitty.
Qasym-Jomart Toqaev Irina Mangýlemen áńgimelesý barysynda Qazaqstan Latviia Respýblikasymen aradaǵy ejelden berik dostyqqa, tereń tarihi bailanystarǵa jáne múddelerge negizdelgen qarym-qatynastardy joǵary baǵalaitynyn atap ótti. Memleket basshysy eki el arasyndaǵy ekijaqty bailanystardyń jyldam damyp kele jatqanyn aityp, Saýda-ekonomikalyq yntymaqtastyq jónindegi úkimetaralyq komissiianyń jumysyna erekshe toqtaldy.
– Qazaqstan Latviiamen kóp josparly yntymaqtastyqty, atap aitqanda, kólik jáne logistika, energetika, jańartylatyn energiia kózderi, jańa tehnologiialar salalary boiynsha yqpaldastyqty odan ári keńeitýge múddeli, – dedi Qazaqstan Prezidenti.
Qasym-Jomart Toqaev Batyr Redjepovpen áńgimelesý kezinde Túrikmenstan yqylym zamannan beri Qazaqstannyń tatý kórshisi ári baýyrlas el ekenin atap ótip, Táýelsizdiktiń 30 jyly ishinde eki memleket te shynaiy strategiialyq áriptestik qatynas ornatqanyn aitty. Memleket basshysy «Kaspii bestigi», Araldy qutqarý jónindegi halyqaralyq qor jáne Ekonomikalyq yntymaqtastyq uiymy aiasyndaǵy birlesken jumystardan zor úmit kútetinin jetkizdi. Bul rette, Memleket basshysy Túrikmenstan kóshbasshysy Gýrbangýly Berdimuhamedovtiń Kaspii sammitin Ashhabadta ótkizý jónindegi usynysyn qoldaitynyn aitty.
– Biz barlyq baǵyttar boiynsha ekijaqty kooperatsiiany ulǵaitýǵa múddelimiz. Kúsh-jigerimizdi biriktire otyryp, jaqyn arada ekijaqty saýda ainalymyn aitýly mejege deiin, iaǵni, 1 milliard dollarǵa jetkizýge múmkindigimiz bar, – dedi Qasym-Jomart Toqaev.
Prezident Tailand Koroldigimen ekijaqty qatynastar jaiynda aita kelip, bul elmen ózara yqpaldastyq Qazaqstannyń Aziia baǵytyndaǵy syrtqy saiasatynyń ajyramas bóligi ekenin atap ótti. Qasym-Jomart Toqaev ekijaqty jáne kópjaqty formattaǵy, onyń ishinde, Birikke Ulttar Uiymy men Aziiadaǵy ózara is-qimyl jáne senim sharalary jónindegi keńes sheńberindegi bailanystardyń tabysty damyp kele jatqanyna nazar aýdardy.
– Biz pandemiiadan keiingi kezeńde ekonomikalyq jáne kommertsiialyq bailanystarymyzdy nyǵaitý maqsatynda Tailand Koroldiginiń Úkimetimen jáne tai kompaniialarymen yntymaqtastyq jasasýǵa múddelimiz, – dedi Memleket basshysy.
Saltanatty rásim sońynda Qasym-Jomart Toqaev Latviia Prezidenti Egils Levitske, Túrikmenstan Prezidenti Gýrbangýly Berdimuhamedovke jáne Tailand Koroli Maha Vachiralongkornǵa júrekjardy sálemi men igi tilegin joldady.
Sheteldik elshiler Prezidentke óz elderi men Qazaqstan arasyndaǵy yntymaqtastyqty odan ári nyǵaitýǵa bar kúsh-jigerin jumyldyratyndaryn aitty.
