Memleket basshysy «Digital Bridge» halyqaralyq tehnologiialyq forýmy aiasynda halyqaralyq IT kompaniialardyń basshylarymen birqatar kezdesý ótkizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev pen Samsung Electronics kompaniiasynyń korporativti prezidenti In Iong Ri IT mamandardy daiarlaý, birlesken ǵylymi-zertteý jumystaryn júrgizý jáne ǵylym salasynda yntymaqtastyq ornatý múmkindikterin qarastyrdy.
InDriver kompaniiasynyń negizin qalaýshy Arsen Tomskii Memleket basshysyna Qazaqstandaǵy kólik qyzmeti salasyndaǵy eń tanymal mobildi qosymshalardyń biriniń qyzmetin damytý perspektivalary týraly aitty. Kompaniia basshysynyń aitýynsha, Astana men Almatyda eki keńse ashylǵan. Sonymen qatar inDriver Astana Hub rezidenti atandy. Arsen Tomskii Spark tsifrlyq ýniversitetin qurý jáne jastardy qoldaýǵa baǵyttalǵan birqatar kommertsiialyq emes jobany júzege asyrý josparlaryn jetkizdi.
G42 kompaniiasynyń direktory Mansýr Ibragim ál-Mansýrimen kezdesýde aqparattyq tehnologiialar men tsifrlyq qaýipsizdik salasyndaǵy yntymaqtastyqty keńeitýge basa nazar aýdaryldy. Qasym-Jomart Toqaev G42 jasandy intellekt, cloud infraqurylymy jáne Big Data salalarynda birlesken jobalardy júzege asyrý josparlary týraly málimetter aldy. Memleket basshysy jasandy intellekt pen IT salasyndaǵy adami kapitaldy damytý elimiz úshin strategiialyq mańyzy bar másele ekenin atap ótti.
Bharti Enterprises jáne OneWeb quryltaishysy ári tóraǵasy Sýnil Barti Mittalmen kezdesýde shalǵai eldi mekenderdi internetpen qamtý úshin tómen orbitaly spýtnikterdi jáne jerústi stantsiialar jelisin paidalaný máseleleri talqylandy.
