Foto: Akorda.kz
Ulttyq mereke – Respýblika kúni qarsańynda Prezident Qasym-Jomart Toqaevtyń Jarlyǵymen elimizdiń áleýmettik-ekonomikalyq, mádeni-rýhani damýyna, halyqtar arasyndaǵy dostyq pen yntymaqtastyqty nyǵaitýǵa qosqan eleýli úlesi men belsendi qoǵamdyq qyzmeti úshin bir top azamat memlekettik nagradalarmen marapattaldy. Olardyń qatarynda óndiris, biznes, bilim berý, densaýlyq saqtaý salalarynyń kórnekti ókilderi, áskeri qyzmetshiler, quqyq qorǵaý organdarynyń qyzmetkerleri, sportshylar, eńbek ardagerleri, mádeniet jáne ǵylym qairatkerleri bar, dep habarlaidy "Ult aqparat" Aqordanyń baspasóz qyzmetine silteme jasap.
«Qazaqstannyń Eńbek Eri» ataǵy Qazaqstan Respýblikasynyń munai-gaz salasyn damytýdaǵy airyqsha jetistikteri, sondai-aq qoǵamdyq-saiasi qyzmettegi asa úzdik eńbegi úshin memleket jáne qoǵam qairatkeri, Parlament Májilisiniń depýtaty B.Izmuhambetovke, elimizdiń áleýmettik-gýmanitarlyq damýyndaǵy asa úzdik jetistikteri úshin Semei qalasy «№ 7 jalpy bilim beretin orta mektep-litseiiniń muǵalimi A.Shúkejanovaǵa jáne óndiristik qyzmettegi erekshe eńbegi úshin Qyzylorda oblysy «Tań LTD» jaýapkershiligi shekteýli seriktestiginiń direktory I.Shaǵyrtaevqa berildi.
«Otan» ordenimen sýretshi A.Aqanaev, belgili aqyn, aitys óneriniń damýyna erekshe eńbek sińgen qairatker J.Ermanov marapattaldy. I dárejeli «Barys» ordeni eńbek ardagerleri M.Aiymbetova men S.Tiesovke, Qonaev qalasy A.Jubanov atyndaǵy №5 orta mektep muǵalimi N.Lige, televiziia ardageri L.Seiitovke, II dárejeli «Barys» ordeni qoǵam jáne memleket qairatkeri Á.Bektaevqa, «KAZGOR» jobalaý akademiiasynyń birinshi vitse-prezidenti T.Eralievke, eńbek ardageri O.Rahmanberdievke, III dárejeli «Barys» ordeni Abai oblysy qoǵamdyq keńesiniń tóraǵasy M.Ainabekovke, Sh.Ýálihanov atyndaǵy Kókshetaý ýniversitetiniń kafedra meńgerýshisi S.Aiaǵanovqa, erkin kúresten eńbek sińirgen sport sheberi I.Bairamýkovke, «Qazaqstan halqyna» qoǵamdyq áleýmettik qorynyń tóraǵasy B.Jámishevke, qoǵam qairatkeri Á.Jolshybekovke jáne eńbek ardageri S.Qyrymqulovqa tabystaldy.
Sonymen qatar belgili ǵalymdarǵa, mádeniet jáne bilim qairatkerlerine, óndiristik sala ókilderine «Parasat» ordeni berildi. Olardyń qatarynda Taldyqorǵan qalasy «Qainar-AKB» JShS direktorlar keńesiniń tóraǵasy Q.Ájmaǵanbetov, «Qazaq tili» halyqaralyq qoǵamynyń vitse-prezidenti Ǵ.Ánes, M.Ospanov atyndaǵy Batys Qazaqstan meditsina ýniversitetiniń professory B.Joldin, Nysana kózdeýden ulttyq quramanyń bas jattyqtyrýshysy O.Dovgýn, Temirtaý qalasynyń Kópbeiindi ana men bala ortalyǵynyń direktory S.Lohvitskii, Atyraý oblystyq ardagerler keńesiniń tóralqa múshesi M.Ǵabdisálimova jáne Ǵ. Músirepov atyndaǵy balalar men jasóspirimderge arnalǵan memlekettik akademiialyq qazaq teatrynyń akteri U.Núsipáli sekildi azamattar bar.
Memleket basshysynyń tapsyrmasymen biyldan bastap ult birligin nyǵaitý jáne qoǵamdyq tatýlyqty qamtamasyz etý jolyndaǵy jemisti eńbegi úshin «El birligi» ordeni taǵaiyndaldy. «El birligi» ordeni alǵash ret Qazaqstan Respýblikasynyń Prezidenti janyndaǵy Memlekettik basqarý akademiiasynyń professory A.Bashmakovqa, Respýblikalyq dúngen etnomádeni ortalyǵy baqylaý keńesiniń tóraǵasy L.Býlarovqa, Respýblikalyq tájik etnomádeni ortalyǵynyń tóraǵasy A.Ismailovqa, Qazaqstan koreileri qaýymdastyǵy qamqorshylyq keńesiniń múshesi R.Kimge, «Deutsche Allgemeine Zeitung» respýblikalyq nemis gazetiniń bas redaktory O.Klimenkoǵa, «Qazaqstan sheshenderi men ingýshtarynyń «Vainah» qaýymdastyǵy» zańdy tulǵalar birlestiginiń teń tóraǵasy A.Muradovqa, «Dýstlik» Qazaqstan Respýblikasy ózbek etnomádeni qoǵamdyq birlestikteriniń qaýymdastyǵy» zańdy tulǵalar birlestigi tóraǵasynyń orynbasary T.Nishanbaevqa tabystaldy.
Sonymen qatar biyldan bastap qurmetti marapattar qataryna «Qazaqstannyń halyq jazýshysy» jáne «Qazaqstannyń halyq ártisi» ataqtary qosyldy. T.Ábdikuly, S.Elýbaev, B.Nurjekeev, S.Smataev, A.Ashirov jáne L.Shashkova «Qazaqstannyń halyq jazýshysy» ataǵyn ielendi. «Qazaqstannyń halyq ártisi» qurmetti ataǵy elimizdiń kórnekti mádeniet qairatkerleri, teatr jáne kino akterleri D.Ahimovqa, M.Tokarev pen D.Aqmoldaǵa, opera ánshileri Sh.Ábilov pen T.Kúzenbaevqa, ataqty ánshiler R.Stamǵazievke, D.Qudaibergenge jáne kúishi A.Úlkenbaevaǵa berildi.
Sondai-aq «Ulttyq ǵylymi kardiohirýrgiia ortalyǵy» KeAQ dárigeri S.Andosova, «M.Qozybaev atyndaǵy Soltústik Qazaqstan ýniversiteti» KeAQ professory A.Pleshakov, «Shyńǵa órleý» QQ direktory R.Sypabekova, «Mańǵystaý oblystyq múgedektik sport klýby» KMM aǵa bapkeri N.Qulyshov jáne basqa da azamattar «Qurmet» ordenimen marapattaldy. Ónerkásip, transport, qurylys, aýyl sharýashylyǵy jáne basqa da materialdyq óndiris salalarynyń 94 jumysshysy men eńbekkeri III dárejeli «Eńbek Dańqy» ordenin ielendi.
II dárejeli «Dostyq» ordeni «Alǵa, Peterbýrg» internet jobasynyń avtory Ivan Chervinskiige berildi.
Al fýtboldan Qazaqstan ulttyq quramasynyń oiynshylary Ashat Taǵybergen, Bahtiior Zainýtdinov jáne Maksim Samorodov «Eren eńbegi úshin» medaline laiyq dep tanyldy.
«Erligi úshin» medalimen Murat Esenqabylov pen Talǵatbek Tóleýbaev nagradtaldy. Murat Esenqabylov órtenip jatqan kólik ishinen 3 áiel men 5 balany aman alyp qalsa, Talǵatbek Tóleýbaev tilsiz jaýdy aýyzdyqtaýda úlken erlik kórsetken.
Para jeńil atletika sportshysy, birneshe respýblikalyq saiystardyń jeńimpazy Aisulý Súleimenovaǵa «Shapaǵat» medali tabystaldy.
«Qazaqstannyń eńbek sińirgen qairatkeri» qurmetti ataǵy ǵylym jáne mádeniet salalarynyń 31 kórnekti ókiline jáne «Qazaqstannyń eńbek sińirgen ustazy» qurmetti ataǵy Aqmola oblysy «№4 «Bolashaq» oblystyq mamandandyrylǵan mektep-litsei-internatynyń muǵalimi Ú.Eńsebaevaǵa berildi. Qazaqstan Respýblikasynyń Qurmet gramotasymen 143 adam nagradtaldy.
Áskeri jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaitý kezinde kórsetken erligi men qajyr-qairaty úshin áskeri qyzmetshiler men quqyq qorǵaý organdarynyń ókilderi I jáne II dárejeli «Dańq» ordenderimen, II jáne III dárejeli «Aibyn» ordenderimen, «Erligi úshin» jáne «Jaýyngerlik erligi úshin» medaldarymen marapattaldy.
Jalpy biylǵy memlekettik nagradalardy taǵaiyndaýda qarapaiym azamattarǵa basymdyq berildi. Atap aitqanda, marapattalǵandar arasynda 298 ustaz ben densaýlyq saqtaý salasynyń qyzmetkerleri, 259 aýyl sharýashylyǵy mamany, 119 eńbek ardageri, óndiris salasynyń 88 jumysshysy bar. Bul – qarapaiym eńbekkerlerdiń mártebesin asyrýǵa, qoǵamdaǵy qadirin arttyrýǵa baǵyttalǵan naqty qadam.
Nagradtalǵandardyń tizimi baspasózde jariialanady.
