Berdibek Saparbaev QR Premer-Ministriniń orynbasary laýazymyna taǵaiyndaldy, dep habarlady Aqordanyń baspasóz qyzmeti.
"Berdibek Mashbekuly Saparbaev Qazaqstan Respýblikasy premer-ministriniń orynbasary bolyp taǵaiyndalsyn, ol Eńbek jáne halyqty áleýmettik qorǵaý ministri qyzmetinen bosatylsyn", - dep jazylǵan Toqaevtyń jarlyǵynda.
Buǵan deiin vitse-premer qyzmetin Gúlshara Ábdiqalyqova atqarǵan bolatyn. Ol depýtat mandatyn aldy.
Premer-ministrdiń birinshi orynbasary - qarjy ministri Álihan Smaiylov. Úkimet basshysynyń taǵy bir orynbasary - Jeńis Qasymbek.
Berdibek Máshbekuly SAPARBAEV 1953 jyly 9 aqpanda dúniege keldi.
Qyzylorda oblysynyń Jańaqorǵan aýdanynyń Besaryq aýylynyń týmasy, bilimi joǵary. 1977 jyly Almaty Halyq sharýashylyǵy institýtyn «Ekonomika jáne materialdyq-tehnikalyq jabdyqtaý» mamandyǵy boiynsha bitirdi. Ekonomika ǵylymdarynyń doktory, professor.
Eńbek jolyn Qyzylorda oblysynyń Zadarinskii sovhozynyń jumysshysynan bastady (1969-1971 jyldary); áskeri qyzmetin ótkerdi (1971-1973 jyldary). Institýtty bitirisimen Respýblikalyq memlekettik eńbek jinaqtaý kassalary (gostrýdsberkassy) basqarmasynda ekonomist (1977); QazKSR Qarjymininde ekonomist, aǵa ekonomist, jetekshi, bas ekonomist, bólim bastyǵynyń orynbasary (1977-1988 jyldary); josparlaý-qarjy basqarmasynyń bastyǵy, Bas ekonomika basqarmasynyń bastyǵy, Qazaqstan Respýblikasy Bilim ministriniń orynbasary (1988-1993 jyldary); Prezident Apparaty bólimi men Qazaqstan Respýblikasy Ministrleri kabineti meńgerýshisiniń orynbasary (1993); Qazaqstan Respýblikasy Ministrler kabinetiniń Ister basqarmasynyń Qarjy, eńbek jáne áleýmettik qorǵaý bólimi meńgerýshisiniń orynbasary jáne meńgerýshisi (1994-1995 jyldary) boldy.
Qazaqstan Respýblikasy Ministrler kabineti Apparatynyń basshysy (1995); Qyzylorda oblysynyń ákimi (1995-1999 jyldary); Ońtústik Qazaqstan oblysynyń ákimi (1999-2002 jyldary) qyzmetterin atqardy;
Qazaqstan Respýblikasy Kedendik baqylaý agenttiginiń tóraǵasy, Qazaqstan Respýblikasy Qarjy vitse-ministri - Kedendik baqylaý komitetiniń tóraǵasy (2002-2006); Premer-Ministr Keńsesi basshysynyń orynbasary - Qazaqstan Respýblikasy Parlamentindegi Úkimettiń Ókili (2006-2007); Qazaqstan Respýblikasynyń Ekonomika jáne biýdjettik josparlaý vitse-ministri (2007 jyly aqpan - 27 tamyz). 2007 jyldyń tamyzynan Qazaqstan Respýblikasynyń Eńbek jáne halyqty áleýmettik qorǵaý ministri. 2009-2014 jyldary - Shyǵys Qazaqstan oblysynyń ákimi. 2014-2015 jyldary Qazaqstan Respýblikasy Premer-Ministriniń orynbasary. 2015-2019 jyldary Aqtóbe oblysynyń ákimi qyzmetin atqardy.
«Qurmet» (1999), «Parasat» (2007) ordenderimen, «Astana» (1998), «Qazaqstan Respýblikasynyń táýelsizdigine 10 jyl» (2001), «Qazaqstan Respýblikasynyń Konstitýtsiiasyna 10 jyl» (2005) medaldarymen marapattalǵan.
QR Eńbek jáne áleýmettik qorǵaý ministri laýazymyn 2019 jyldyń aqpanynan beri atqaryp keldi.
Aita keteiik, osyǵan deiin Gúlshara Naýshaqyzy Ábdiqalyqovanyń Qazaqstan Respýblikasy Premer-Ministriniń orynbasary qyzmetinen bosatylǵandyǵyn jáne Parlament Májilisiniń depýtaty laýazymyna taǵaiyndalǵandyǵyn jazǵan bolatynbyz.
