Memleket basshysy Qasym-Jomart Toqaev Belarýs Respýblikasynyń Premer-Ministri Roman Golovchenkony qabyldady, dep habarlaidy "Ult aqparat" Aqordanyń resmi saityna silteme jasap.
Prezident Qasym-Jomart Toqaev Qazaqstan men Belarýstiń saýda-ekonomikalyq, ǵylymi-tehnikalyq, gýmanitarlyq salalardaǵy bailanystaryn, sondai-aq, integratsiialyq birlestikter aiasyndaǵy yqpaldastyǵyn oń baǵalady.
Qasym-Jomart Toqaev eki memleket basshylarynyń tyǵyz bailanys jasap turatynyn jáne joǵary deńgeide qol jetkizgen ýaǵdalastyqtardyń sátti júzege asyrylatynyn erekshe atap ótti.
– Sizdiń bul saparyńyzdyń baǵdarlamasy tyǵyz eken. Qostanai oblysyna bardyńyz. Bul ónerkásip jáne aýyl sharýashylyǵy áleýeti turǵysynan óte mańyzdy. Naqty kelisimderge qol jetkizilipti. Senbi kúni Prezidentterińiz Aleksandr Lýkashenkomen sóilestim. Eki memleket arasyndaǵy strategiialyq seriktestikti odan ári damytý máseleleri jóninde pikir almastyq. Qazaqstan úshin Belarýs, shyn máninde, strategiialyq seriktes ári odaqtas el. Yntymaqtastyǵymyzdy nyǵaityp, damyta berý úshin barlyq múmkindikti jasaimyz, – dedi Qazaqstan Prezidenti.
Qasym-Jomart Toqaev ekijaqty kelissózderdiń qorytyndysy Qazaqstan men Belarýs qatynastarynyń kókjiegin odan ári keńeite berýge múmkindik beretinine senim bildirdi.
– Árine, bul ýaǵdalastyqtar bir sáttik emes, sondyqtan oǵan baiyppen qarap, júktelgen mindettemelerdi oryndaýymyz kerek. Iaǵni, bos sózge maldanbai, Sizdiń tarapyńyzdan jáne úkimetter deńgeiindegi kelissózder barysynda aitylǵan barlyq máseleni naqty sheshý qajet, – dedi Memleket basshysy.
Belarýs Premer-Ministri Roman Golovchenko Aleksandr Lýkashenkonyń sálemin jetkizdi jáne eki eldiń saýda-ekonomikalyq bailanystarynyń perspektivalaryna egjei-tegjeili toqtaldy.
– Biz árdaiym odaqtas ári seriktes elmiz. Adami faktor – iskerlik qatynastardy damytý úshin asa mańyzdy. Sondyqtan pandemiiadan keiingi kezeńde saýda-ekonomikalyq yntymaqtastyǵymyzdyń qarqyndy damitynyna senimdimiz. Belarýstiń Qazaqstanǵa, al Qazaqstannyń Belarýske shyǵaratyn eksporty jyldam artyp keledi. Bul Qazaqstan úshin óte jaqsy faktor bolyp tabylady, – dedi Roman Golovchenko.
